सतकया कारणं नक्सा पास यायेत समस्या

ख्वप – ख्वप नगरपालिकाया प्रमुख सुनील प्रजापतिं मुख्य सतक जःखः पुलांगु छेँ पुनःनिर्माण यायेत नक्सा पास यायेगु ज्याय् समस्या वयाच्वंगु खँ धयादीगु दु । नगरप्रमुख प्रजापतिं ख्वपया ब्यासीनिसें कमल विनायकतकया मुख्य सतक जःखः पुलांगु छेँ पुनःनिर्माणय् सतकया मापदण्डया कारणं नक्सा पास यायेत समस्या जुयाच्वंगु धयादीगु दु ।

राष्ट्रिय पुनःनिर्माण प्राधिकरणलिसे ख्वपया निजी आवास पुनःनिर्माणया विषययात कयाः जूगु सहलहया इलय् सतक मापदण्डया कारणं ब्यासीनिसें कमल विनायकतकया सतक जःखः लाःगु छेँया पुनःनिर्माणया निंतिं नक्सा पास यायेत समस्या जुयाच्वंगु वय्कलं धयादिल ।
सतक चिब्या जूगुलिं सतक दुर्घटनाया सम्भावना दुगु व थुकिं यात्रु व लँजुवाःयात समस्या जूगु धासें वय्कलं उगु क्षेत्रयात व्यवस्थित रुपय् फुटपाथ दयेकाः पुलांगु हे शैलीइ छेँ निर्माण यायेगु योजना दुगु जानकारी बियादिल ।

ब्यासीनिसें कमल विनायकतकया सतक सिथय् ख्वपया प्राचीन, धार्मिक, ऐतिहासिक महत्वया सम्पदा नापं सतः, फल्चा, पुखू, ल्वहंहिति दुगु व अज्याःगु थासय् सतक तब्या यायेबलय् उगु सम्पदात नष्ट जुइगुलिं वैकल्पिक लँपु दयेकेमाःगु खँय् नं वय्कलं बः बियादिल ।
‘ब्यासीनिसें कमलविनायकतक तत्काल छेँया नक्सा पास जुइगु स्थिति मदु ।

उगु थासय् सतक मापदण्डया कारणं अन दुगु प्राचीन सम्पदा नष्ट जुइगुलिं यानाः उगु थासय् वैकल्पिक सतक निर्माण यानाः जक सतक मापदण्ड नं भिंकेमाः’ नगरप्रमुख प्रजापतिं धयादिल । सहलहया इलय् काठमाडौं उपत्यका प्राधिकरणया प्रमुख आयुक्त भाइकाजी तिवारीं सतक सिथय् च्वंगु पुलांगु छेँखात पुलांगु हे शैलीं पुनःनिर्माण यायेत नगरपालिकां पहल यायेमाः धासें वैकल्पिक सतकया निंतिं अध्ययन जुयाच्वंगु जानकारी बियादिल ।

प्राधिकरणया कार्यकारी समितिया दुजः डा. चन्द्रबहादुर श्रेष्ठं स्थानीयवासीया राय, सल्लाह व सुझाव कयाः सतकया मापदण्ड हेरफेर यायेगु व मुख्य सतकया सिथय् जवंखवं निखेरं सतकपेटी निर्माण यायेमाःगु खँय् बः बियादिल ।

सम्बन्धित बुखँ

LEAVE YOUR COMMENTS