नेपाःपाखें पने मफयेक पेट्रोल तस्करी
येँ -नेपालय् स्वयां भारतय् पेट्रोलियम पदार्थ थिके जुइवं नेपाःपाखें भारतय् पनां पने हे मफयेक पेट्रोल व डिजेल तस्करी जुयाच्वंगु दु ।
नेपाः वइगु इन्धन भारतय् यंकाः मीपिं तस्करत थौंकन्हय् थुलि सक्रिय जुयाच्वंगु दु कि उमित पनेगु लागिं नेपाःपाखें याःगु हरेक कुतः असफल जूगु खँ धाःगु दु ।
नेपालय् पेट्रोल कायेगु लागिं भारतपाखें टीन, ड्रम जक मखु इन्धन ल्ह्यइगु ट्यांकर समेत हे वयेगु यानाच्वंगु खँ सीमा लागाय् च्वंपिं मनूतय्सं धाःगु दु । थुमिसं नेपालय् कया यंकूगु इन्धन भारतय् थिकेगु भावं मीगु यानाच्वंगु दु ।
थौंकन्हय् नेपालय् स्वयां भारतय् पेट्रोल प्रति लिटर १५ तकां निसेंकयाः २४ तका तक थिके जुयाच्वंगु दु । उकिं भारतं ततःग्वःगु गाडी, ड्रम, टीन व इन्धन ल्ह्यइगु ट्यांकर समेत वयाः थःथाय्पाखे ल्ह्येगु यानाच्वंगु दु ।
न्हिंन्हिं हे भारतीय नागरिकत हुल हुल मुनाः नेपाःपाखे दुहां वसें इन्धन ज्वना वनीगु स्वयेबलय् वंगु नाकाबन्दीया इलय् थेंज्याःगु दृश्य खनेदु । अबले नं खुल्ला रुपं हे भारतं वइगु इन्धन सीमा लागाय् प्वंकाः नेपाःपाखे हइगु खः । आः धाःसा नेपाःया इन्धान भारतपाखे यंकेगु यानाच्वंगु दु ।
नेपाःया इन्धन भारतपाखे तस्करी जुयाच्वंगु खँ सीवं आपूर्ति मन्त्रालयं थीथी सीमा लागाया स्थानीय प्रशासनयात पौ हे च्वयाः अन जुयाच्वंगु तस्करी पनेगु लागिं इनाप याःगु खः । तर आपूर्तिं अज्याःगु इनाप याना हःसां तस्करी पनेत सफल धाःसा जुयाच्वंगु मदुनि ।
थ्व तस्करी पनेगु लागिं आपूर्ति मन्त्रालयं थौंकन्हय् सीमा लागाय् पेट्रोल छ्वयेगु हे कम यानाच्वंगु दु । गुलि अप्वः पेट्रोल छ्वल उलि हे अप्वः भारतपाखे चोरी निकासी जुइ धकाः कम यानाः छ्वयाच्वंगु दु । तर आपूर्तिं कम जक इन्धन छ्वया हइगु व मेखे दुगु इन्धन नं भारतपाखे चोरी निकासी जुयाच्वंगुलिं सीमा लागाया नेपाली भूभागय् धाःसा पेट्रोलियम पदार्थया हाहाकार जुयाच्वंगु दु ।
थःगु लागाय् पेट्रोलियम पदार्थया हाहाकार जूगुलिं स्थानीय उपभोक्तातय्सं नेपाली पम्प सञ्चालकतय्सं भारतीय तस्करतलिसे मिले जुयाः सीमा पारी हे इन्धन छ्वयेगु ज्या यानाच्वंगु व उकिं यानाः नेपाःया सीमा लागाय् इन्धन अभाव जुयाच्वंगु द्वपं बिउगु दु । भारतपाखें चिकंया ट्यांकर हे हयाः उखे यंकेगु यानाच्वनं नं पम्पवालातय्सं उमित पनेगु ज्या मयाःगुलिं थुकी उमिगु नं संलग्नता दयेमाः धकाः आशंका याःगु खः ।
LEAVE YOUR COMMENTS