कम्बोडियाय् थःगु लगानी मदुगु ओलीया लिसः
येँ (नेपालभाषा टाइम्स)÷वंगु मोहनिजःछि हे सामाजिक सञ्जालय् छगू हल्ला न्यनाच्वन, नेकपा (एमाले) या अध्यक्ष केपी ओलीं कम्बोडियाया छगू टेलिकम कम्पनीइ ३ हजार डलर लगानी यानातःगु दु । केपी ओलीयाके थ्व ध्यबा गनं वल ? अझ खास यानाः एमालेया हे पुलांम्ह कार्यकर्ता दुर्गा प्रसाइँनं ला ओलीं थ्व लगानी यानाच्वंगु सत्य खः, सुनानं मखु धकाः प्रमाणित यायेफुसा या धकाः हाथ्या समेत बियादिल ।
लिसें अजूचायापुक छुं विदेशी सञ्चार माध्यमं समेत ओलीं कम्बोडियाया टेलिकमय् लगानी यानातःगु दु धासें समाचार हे प्रशारण याना हल । लिसें उकिया हे हवाला बिसें नेपाःया हे छुं टेलिभिजन च्यानलतय्सं नं उकिया बारे समाचार दयेकाः प्रशारण याना हल । वया हे दथुइ केपी ओलीं प्रधानमन्त्री पुष्पकमल दाहालयात नापलाःगु समाचार नं पिहां वल । थुकिं यानाः ओलीया लगानी सम्बन्धी हल्ला झन् तच्वः जुयाः पिहां वल ।
थ्वहे झ्वलय् अबलय् पिहां वःगु थ्व हल्लायात अध्यक्ष केपी ओलीं म्हिगः लिसः बियादीगु दु । म्हिगः पोखराय् जूगु छगू ज्याझ्वलय् न्ववासें ओलीं थम्हं कम्बोडियाय् ३ हजार करोड दां लगानी यानातयागु खँ सुनां नं प्रमाणित यानाः क्यने फत धाःसा वयात मेगु द्वःछि दां थपे यानाः ३ हजार करोड नं बिया छ्वये धकाः हाथ्या बियादीगु दु । वय्कलं धयादिल, ‘यदि जिं उलिमछि ध्यबा सुचुकातल धइगु खँ सुनानं पत्ता लगे यात धाःसा यक्व ला मखु द्वःछि दां थपे यानाः बी । व ३ हजार करोड नं वयागु हे जुल ।’
ओली विरुद्ध थ्व हल्ला सार्वजनिक जुइवं एमालेया वरिष्ठ नेतातय्सं मोहनिया इलय् हे खण्डन यासें हल्ला याइपिंत द्वपं साबित यायेत हाथ्या बियादीगु खः । अध्यक्ष ओलीं नं थः विरुद्ध न्हापा नं थज्याःगु हल्ला वयेगु याः धासें थ्व हल्ला याना जुइपिं मनूत ‘लाछि खिचा’ खः धकाः द्वपं बियादीगु दु ।
LEAVE YOUR COMMENTS