‘पिनें वइपिं मनूतयत त्वाःत्वालय् पनादिसँ’

येँ – वंगु छुं न्हिनिसें पिने जिल्लां आपालं मनूत येँय् दुहां वयाच्वंगु खँयात कयाः येँया जनप्रतिनिधित चिन्तित जूगु दु । यदि पिने जिल्लां वःपिं मनूत गनं नं च्वं वःगु खन धाःसा उमित थःगु छेँय् दुमकायेत व मेथाय् च्वंगु खंसां सकलें जानाः त्वालय् मतयेत स्थानीय जनता हे सचेत जुइमाःगु खँ नं जनप्रतिनिधितय्सं धाःगु दु ।

वंगु बुधवाः तिनि तराईया मलंगवां सरकारी गाडीइ च्वनाः छुं मनूत येँय् वःगु खःसा उमित स्थानीय जनता व जनप्रतिनिधि मिले जुयाः गनं वःगु खः अन तुं लित छ्वया बिउगु खः । सरकारी जीपय् च्वनाः येँय् वःपिं थ्व मनूत शुरुइ थनया वडा नं. २३ य् च्वनेत स्वःगु खःसा अन स्थानीय जनतां गाडीं तकं क्वकायेके मबीवं उपिं वडा २२ या न्हूसतक लागाय् वंगु खः । तर न्हूसतकय् नं उमित गाडीं क्वकायेके मबीवं उपिं अलपत्रय् लाःगु खः । लिपा २२ वडाया वडा अध्यक्ष चिनकाजी महर्जनं उमिगु लागिं विशेष पासया व्यवस्था यासें मलंगवाय् तुं लित छ्वया बिउगु खः ।

थज्याःगु घटना येँय् यक्व हे जुयाच्वंगु कारणं आः थनया स्थानीय जनता हे सचेत जुइमाःगु खँ वडा अध्यक्ष महर्जनं कनादिल । ‘म्हमसिउपिं मनूत गनं नं वःगु खन धाःसा उमित त्वालय् हे दुमकायेगु लागिं स्थानीय मनूत सचेत जुइमाःगु दु,’ वयकलं धयादिल ।

पिनेयापिं मनूत यक्व हे दुहां वयाच्वन धयागु खँ न्यने दयाच्वंगु जानकारी बिसें वडा अध्यक्ष महर्जनं उमिगु कारणं येँय् कोरोनाया खतरा तसकं अप्वया वःगु बिचाः नं प्वंकादिल ।

लकडाउनया कारणं थौंकन्हय् मनूत छेँय् छेँय् हे च्वनाच्वंगु दु, छुं जुयाः पिनेयापिं मनूत थःगु त्वालय् वःगु खन धाःसा छेँनं पिहां वयाः तर सामाजिक दूरी कायम यासें उमिगु प्रतिकार यायेमाःगु बिचाः नं वय्कलं तयादिल ।

राजधानी येँ कोरोना संक्रमणया ल्याखं सुरक्षित जूगु व थन स्थानीय सरकार लगायत थीथी सामाजिक संस्थातयसं सितिकं नये-त्वनेया व्यवस्था यानाच्वंगु कारणं यानाः नं पिनेयापिं मनूत सुलाः सुलाः जूसां दुहां वयाच्वंगु अनुमान दु । पिनें दुहां वइपिं मनूतयत सम्बन्धित नगरय् हे पनेगु लागिं प्रशासनं छुं कुतः मयाःगु खँय् नं थनया जनप्रतिनिधित निराश जूगु दु ।

थ्वहे झ्वलय् येँ महानगरपालिकापाखें येँय् इनेगु यानाच्वंगु राहतया विषययात कयाः नं पुनर्विचार यायेमाःगु सः पिहां वःगु दु । खास यानाः सत्तारुढ दल नेकपा दुने राहत गबले तक इनाच्वनेगु धइगु बारे न्ह्यसः तयाहःगु खँ सीदुगु दु । येँय् राहत काइपिं मनूतय् ल्याः धमाधम अप्वया वनाच्वंगु, छम्ह हे मनुखं थीथी वडाय् वनाः राहत मुंकेगु ज्या यानाच्वंगु, राहत वितरण याइबलय् कचवं पिकायेगु कुतः जुइगु व थ्वहे इलय् पिने जिल्लां वइपिं मनूत समेत थपे जूगुलिं थ्व राहत वितरणया ज्याय् पुनर्विचार यायेमाःगु सः पार्टी दुने थ्वया वःगु खँ धाःगु दु ।