प्रदेश १ या सरकारयात सर्वोच्चं मान्यता मबिल

येँ (नेपालभाषा टाइम्स)- प्रदेश १ (कोशी) या मुख्यमन्त्री उद्धव थापां प्यन्हु न्ह्यः काःगु विश्वासया मतयात सर्वोच्च अदालतं मान्यता मबीगु संकेत खने दया वःगु दु । थापायात वःगु विश्वासया मत संविधानसम्मत खने मदुगुलिं थुकिया अन्तिम आदेश मवःतले सरकारं दीर्घकालीन प्रकृतिया निर्णय मयायेत अन्तरिम आदेश बिउगु दु ।

थापां संविधानया अःखः जुइक विश्वासया मत काःगु धासें एमाले संसदीय दलया नेता हिक्मत कार्कीं सर्वोच्चय् रिट दायर याःगु खःसा
म्हिगः सर्वोच्चं थुकथंया प्रारम्भिक सुनुवाइ याःगु खः ।

मुख्यमन्त्री थापां विश्वासया मत काःगु इलय् सभाध्यक्ष जुयाच्वंम्ह इस्राइल मन्सुरीं समेत मतदान याःगु खः । थुकी सभाध्यक्ष जुयाच्वंम्ह मन्सुरीया मत बदर जुइमाः धकाः नं रिटय् माग यानातःगु दु ।

म्हिगः न्यायाधीश इश्वरीप्रसाद खतिवडाया एकल इजलाशं मुख्यमन्त्री थापाया नामय् थ्व अन्तरिम आदेश जारी याःगु खः । थापाया सरकार वैध खः लाकि अवैध खः धइगु फैसला धाःसा आः मेगु सुनुवाइ लिपा जुया वनीगु खँ धाःगु दु । थ्व मुद्दाया मेगु पेशी आः भदौ १५ गते यायेगु धकाः नं दिन तोके याःगु दु । अबलय् तकया दुने सरकारं थःपिं वैध खः धकाः दावी समेत आवश्यक भ्वं पेश यायेत नं आदेश बिउगु दु ।

सर्वोच्चया थ्व आदेश लिपा आः प्रदेश १ या सरकार कामचलाउ सरकार जूवंगु दु । थ्व सरकारं आः न्हियान्हिथं यायेगु ज्याखँ बाहेक मेगु छुं नं ज्या याये खनी मखु । प्रदेशय् सरकार विवादय् लाःसां मुख्यमन्त्री थापां अध्यादेश मार्फत बजेट हयेगु तयारी यानाच्वंगु खँ सीदुगु दु । तर हल धाःसा उकियात आः विरोध यायेगु तयारी जुयाच्वंगु दु । थुकिं यानाः प्रदेश १ या राजनीति आः हानं अन्यौलग्रस्त जू वंगु दु ।