येँया दुने लागाय् नं व्यापक डेंगु

येँ – डेंगु ल्वचं येँ देय्या भित्री लागाय् तकं गाक्कं लिच्वः लाकेधुंकूगु संकेत खने दया वःगु दु । खास यानाः येँया भित्री लागाय् च्वंपिं स्थानीयवासीतय् उपचार याकः वइगु थनया छत्रपाटी अस्पतालय् वयाच्वंगु डेंगु ल्वगितय् भीड जक स्वःसां नं थ्व समस्या गुलि तःधनेधुंकल धइगु सीके फइ ।

थौंकन्हय् तःधंगु अस्पतालय् जक मखु छत्रपाटी अस्पतालय् तकं डेंगुया विरामीत ग्वाःग्वाः गःगुलिं अन परीक्षण व हि जाँच यायेगु ज्याय् तकं समस्या वयाच्वंगु खँ लिमलाः फमलाः ब्वाँय् जुयाच्वंपिं कर्मचारीतय्सं कंगु दु । थौंकन्हय् अन डेंगुया आशंका यासें हि जक जाँचे याः वइपिं विरामीत हे न्हिं सलंसः थ्यनाच्वंगु दु ।

अस्पतालं चापयात ध्यानय् तयाः डेंगुया हि जाँचया ध्यबा नं कम यानाः ५०० तका जक याःगु दु ।जाँचे याः वइपिं अप्वयाः हि जाँचया रिपोर्ट तकं छन्हु लिपा जक बी फयाच्वंगु खँ नं धाःगु दु । थुकथं हे थौंकन्हय् येँया ततःधंगु अस्पताल व मेमेगु स्वास्थ्य क्लिनिकय् नं डेंगुया आशंका यासें क्यं वइपिं विरामीतय् ल्याः अप्वयाच्वंगु दु । तर क्यं वइपिं विरामी सकलें डेंगुया शिकार धाःसा मजूगु खँ अस्पताल सूत्रतय्सं धाःगु दु ।

सम्बन्धित बुखँ

LEAVE YOUR COMMENTS