बुद्ध जीवनीया किपा ब्वज्या
ख्वप(नेपालभाषा टाइम्स)÷वंगु बछलाथ्व शुक्रवाः ख्वप लाय्कू लागाय् बुद्ध जीवनीया किपा ब्वज्या जुल । नेवाः देय् दबू ख्वप नगर कमिटीया ग्वसालय् उगु किपा ब्वज्या जूगु खः ।
२५६७ क्वःगु स्वांयाःपुन्हिया लसताय् बुद्ध जीवनीइ आधारित उगु किपा ब्वज्या मुनि विहार ख्वपया समन्वयय् जूगु खः । भगवान बुद्धया जन्म, संबोधी ज्ञान लाभ, महापरिनिर्वात प्राप्त यानाबिज्याःगुलिसें वसपोलया जीवनय् आधारित थीथी घटनाक्रमया किपा ब्वज्याय् दुथ्याकातःगु खः ।
ब्वज्याय् वसपोल विहार चक्रमणय् बिज्याःगु इलय् खंगु ल्वगि, फ्वंगि, मृत्युया घटना, भगवान बुद्धयात वःगु मार, वसपोलं भिक्षु संघयात बियाबिज्याःगु उपदेश, भिक्षाटन, गृहत्याग आदि थीथी घटनाया किपा नं तयातःगु खः ।
भगवान बुद्धया जीवन, दर्शनलिसें वसपोलं प्राणी मात्रया रक्षाया निंतिं याना बिज्याःगु विश्व शान्तिया सन्देश न्हू पुस्तायात नं सयेके सीके बीगु ल्याखं किपा ब्वज्या यानागु नेवाः देय् दबू ख्वप नगर कमिटीं न्ह्यथंगु दु ।
किपा ब्वज्या स्थानीय स्वदेशी व विदेशी पर्यटकलिसें स्थानीय विद्यालयया विद्यार्थीतय्सं नं अवलोकन याःगु खः ।
LEAVE YOUR COMMENTS