स्वंगूगु देशया सामान नं तातोपानीं वइगु

येँ – नेपाः व चीन दथुइ पारवाहन सन्धि जूगु प्यदँ लिपा वयाः आः स्वंगूगु मुलुकया सामान नं चीन जुयाः हयेगु लागिं नेपालं पहल शुरु याइगु जूगु दु । उकिया लागिं चीनं थ्वहे जेठ महिनाया दुने तातोपानी नाका सञ्चालन यायेगु तयारी यानाच्वंगु दु । भुखाय् लिपा बन्द जूगु तातोपानी नाका हानं सञ्चालन यायेगु सवालय् चीनं वास्ता मयायेवं चीनं हयेमाःगु सामान फुक्क रसुवाया केरुङ नाका जुयाः दुत हयेमाःगु जूगु खः ।

तर केरुङय् आवश्यक पूर्वाधार मदुगु लिसें लँ नं स्यंगु जुयाः नेपालं अनं सामान हयेगु असुविधा जूगु खँ धायेगु यानाच्वंगु खः । यदि नेपाः व चीन दथुइ जूगु पारवाहन सन्धियात कार्यान्वयन यायेगु खःसा तातोपानी नाका खोले मयासें मगाः धइगु वाःचायेकाः चीनं थ्व नाका नं चायेकेगु ज्या याःगु खः ।

नेपाः–चीन दथुइ जूगु पारवाहन सन्धिइ चीनं नेपाःयात स्वंगूगु मुलुकया सामान हयेगु लागिं थःगु देशया प्यंगू सामुद्रिक बन्दरगाह व स्वंगू सुख्खा बन्दरगाह प्रयोग याके बीगु खँ दुथ्याकातःगु दु । थुकी नेपालं सामुद्रिक बन्दरगाहं ज्वना वःगु सामान नेपाःया सीमा लिक्क लाःगु सुख्खा बन्दरगाहय् मुंकेगु व अनं लिपा नेपाः हयेगु योजना दयेकातःगु दु ।

थौंकन्हय् रसुवा नाकाय् सुख्खा बन्दरगाह दयेकूगु हे मदुनि । तातोपानी नाकाय् धाःसा सुख्खा बन्दरगाह दयेकेधुंकूगु दु । उकिं थ्व सुख्खा बन्दरगाह प्रयोग यायेगु खःसा तातोपानीया नाका नं खोले मयासें मगाः । सम्भवतः मेगु वालंनिसें तातोपानी नाका चालीगु सम्भावना दु । यदि थ्व नाका चाल धाःसा नेपाःया व्यापारीतय्त तःधंगु हे राहत जुइगु खँ धाःगु दु ।

नेपालं स्वंगूगु मुलुकं झिके याइगु सामान थ्वहे बन्दरगाह जुयाः दुत हयेगु तयारी यानाच्वंगु दु । रसुवा व तातोपानी बाहेक नेपालं चीनलिसे स्वाःगु हुम्लाया यारी नाका नं प्रयोग यानाच्वंगु दु । तर अन माक्व पूर्वाधार मगाःगुलिं प्रयोग यायेत थाकुयाच्वंगु खँ धाःगु दु ।