निःशुल्क खै परीक्षण शिविर

ख्वप – नेपाल क्षयरोग निवारण संस्था ख्वप शाखां चाँगुनारायण नगरपालिकाय् छगू निःशुल्क खै परीक्षण शिविर संचालन याःगु दु । चाँगुनारायण नगरपालिका वडा नं. ४ स्थित तामाङतय् वस्तीइ उगु निःशुल्क शिविर संचालन याःगु खः । राष्ट्रिय क्षयरोग नियन्त्रण ज्याझ्वः अन्तर्गत ‘क्षयरोग खोजी व रोकथाम संचालन ज्याझ्वः’ धइगु मुख्य उद्देश्यया लिसें संस्थापाखें उगु शिविर संचालन याःगु खः ।

राष्ट्रिय क्षयरोग केन्द्र ख्वपया ग्वाहालिइ संचालन जूगु उगु शिविरय् तामाङ बस्तीइ च्वंपिं मिसा–मिजंया खै परीक्षण यायेगु ज्या जूगु संस्थां न्ह्यथंगु दु । शिविरय् खै परीक्षण यायेगु झ्वलय् छम्हेसित क्षयरोग जूगु पत्ता लगे जूगु संस्थाया सभापति राम सिख्वःनं जानकारी बियादीगु दु ।

सरुवा ल्वय्या रुपय् दुगु क्षयरोग समुदाय दुने हे मालाः उपचारय् हयेगु ज्या निरन्तर रुपं जुयाच्वंगु व थीथी ल्वय्लिसे नं संक्रमित रुपं खने दया वयाच्वंगुलिं इलय् हे पत्ता लगे यायेगु ल्याखं थुकथं निःशुल्क रुपं खै परीक्षणया शिविर संचालन यानागु संस्थाया कार्यालय सचिव हिरयण्प्रताप सांगामिं कनादिल ।