धरानय् निसःम्ह कलाकारया हुलाप्याखं
येँ(नेपालभाषा टाइम्स)÷ पासा खलः धरानया ग्वसालय् जूगु स्वन्हुयंकं यःमरि महोत्सव क्वचाःगु दु । यःमरि महोत्सवया हे झ्वलय् धरानय् करिब निसःम्ह प्याखंम्वःतय्सं नेवाः प्याखं नं न्ह्यब्वःगु खः । नेवाः समुदायय् बिस्कं महत्वं जाःगु यःमरि पुन्हिया लसताय् महोत्सवलिसें निसःम्ह कलाकारं परम्परागत नेवाः हुलाप्याखं नं न्ह्यब्वःगु खः ।
‘धरानया छेँय् छेँय् यःमरि’ धइगु नारालिसें जूगु महोत्सव मंसिर २९, ३० व पुस १ गते स्वन्हुयंकं जूगु खः । यःमरि महोत्सवया हे झ्वलय् स्वनिगलं पिने न्हापांखुसी निसःम्ह नेवाः कलाकारतय्संं छक्वलं परम्परागत नेवाः प्याखं न्ह्यब्वःगु खः ।
खलःया ग्वसालय् जूगु न्याक्वःगु संस्करणया महोत्सवय् परम्परागत नेवाः हुलाप्याखं न्ह्यब्वयेगु निंतिं छुं दिं न्ह्यःनिसें अभ्यास (रिहर्सल) यायेगु ज्यातकं जुयाच्वंगु खः । नेवाः देय् दबूया केन्द्रीय न्वकु अनिल मास्कें धरानया स्थानीयवासिन्दाया सक्रियताय् नेवाः कला, संस्कृति ल्यंकेगु तातुनाः यःमरि महोत्सवलिसें परम्परागत नेवाः हुलाप्याखं (धिमे प्याखं) नं न्ह्यब्वयागु जानकारी बियादीगु दु ।
शताब्दियौं न्ह्यःनिसेंया इतिहास कुबियाच्वंगु यःमरिलिसें परम्परागत नेवाः नसाज्वलंया संरक्षण, नेवाः कला, संस्कृति न्हू पुस्तायात हस्तान्तरण व समाजय् सकारात्मक प्रभाव व सन्देश बीगु ल्याखं थुकथंया ज्याझ्वःया ग्वसाः ग्वयागु ज्याझ्वःया कजि अमृत आचाजुं कनादिल ।
महोत्सवया इलय् धरानया छेँखापतिकं यःमरि दयेकेनापं लाखे प्याखं, धिमे प्याखं मेमेगु हुलाप्याखंलिसें सांस्कृतिक ज्याझ्वः न्ह्यब्वःगु खः ।
LEAVE YOUR COMMENTS