यलय् घरायसी कचवंया मुद्दा अप्वल

यल – वंगु छुं दिं थुखे थन छेँय् जुइगु ल्वापु (घरायसी कचवं)या मुद्दा दर्ता जुइगु क्रम अप्वःगु दु । उकिसनं मिसा व मस्तय्त जुइगु घटना अप्वः दु । यल महानगरीय प्रहरी परिसरय् थुगु आर्थिक दँया शुरुनिसें आतकया दुने झण्डै सत्या अज्याःगु मुद्दा दर्ता जूगु दु । परिसरया मिसा व बालबालिका सेवा केन्द्रय् मिसा हिंसा सम्बन्धी थीथी कथंया घटनात दर्ता जुयाच्वंगु दु ।

उकीमध्ये नं दकलय् अप्वः घरेलु हिंसा व ल्वापुया मुद्दा दर्ता अप्वः दुगु केन्द्रया प्रमुख चञ्चला श्रेष्ठं कनादिल । कलाःभाःतया दथुइ जुइगु पारिवारिक ल्वापु, आर्थिक स्थितियात कयाः जुइगु ल्वापु थेंज्याःगु घटनात अप्वः दुगु केन्द्रं न्ह्यथंगु दु ।
अज्याःगु ल्वापुइ नं अप्वःथें मध्यम व निम्न वर्गया नापं अशिक्षित परिवारय् जुइगु ल्वापु अझ अप्वः दु ।

केन्द्रया प्रमुख श्रेष्ठं धयादी, ‘सम्पन्न परिवारय् नं अज्याःगु ल्वापु वा कचवं मदुगु मखु, तर समाजपाखें छुं धाइला धइगु ग्याःचिकुया कारणं पीडित मिसातय्सं उजुरी यायेगु यानाच्वंगु मदु ।प्रविधिया प्रयोगलिसें जीवनशैलीइ वःगु हिउपाः व सामाजिक जीवनय् खने दुगु हिउपाःया कारणं न्हू न्हूकथंया घटनातकं वयेगु यानाच्वंगु दु ।

अज्याःगु न्हूगु घटनाय् इहिपा मयासें नापं च्वनेगु व इन्टरनेट व प्रविधिया प्रयोग, सामाजिक संजलया प्रयोगपाखें जुइगु हिंसाया घटनात नं प्रहरीइ दर्ता जुइगु यानाच्वंगु दु । गुलिखे मिसात थः भाःतं मेम्ह ब्याहा याःगु धकाः नं वयाच्वंगु दु, तर अज्याःगु मुद्दाय् अनुसन्धान यायेगु इलय् ब्याहा मयाःसे नापं च्वनाच्वंगु नं लुया वःगु केन्द्रं न्ह्यथंगु दु ।