कोरानाया प्यंगूगु लहर वइगु खतरा

येँ – स्वास्थ्य तथा जनसंख्या मन्त्रालयं जःलाखःला देय् भारतय् हानं कोरोना संक्रमण अप्वया वनाच्वंगु जुयाः नेपालय् नं सतर्कता नालेत इनाप याःगु दु । मन्त्रालयया प्रवक्ता डा. संगीता कौशल मिश्रां म्हिगः छगू सुचं जारी यासें कोभिड संक्रमण दर भारत लगायत जःलाखःला देशय् अप्वया वनाच्वंगु कारणं संक्रमण पनेत जनस्वास्थ्य सम्बन्धी मापदण्ड नालेत नं इनाप यानादीगु खः ।

मन्त्रालयया सुचनय् फयांफछि खोप केन्द्रय् वनाः कोभिड विरुद्धया खोप कायेत व पूर्ण मात्राया खोप काःगु स्वला फुइधुंकूपिंसं बुस्टर मात्राया खोप कायेत नं इनाप यानातःगु दु । भारतय् प्यक्वःगु लहरया कोरोना खने दयेवं नेपालं नं सतर्कता नालेत इनाप याःगु खः । भारतय् थौंकन्हय् संक्रमितया ल्याः न्हिं ९० प्रतिशतया दरं अप्वया वनाच्वंगु दु ।

भारतय् आकाझाकां संक्रमितया ल्याः अप्वयेवं राज्य सरकारं हाकनं स्वास्थ्य मापदण्ड जारी यायेगु ज्या नं शुरु जुइधुंकूगु दु । नेपाःलिसे सीमा स्वाःगु उत्तर प्रदेशय् हानं मास्क अनिवार्य याःगु दुसा थीथी कथंया सभा सम्मेलन यायेगु ज्या नं पनाबिउगु दु ।

उत्तर प्रदेशय् स्वन्हुया दुने निसः स्वयां अप्वः संक्रमित लुइवं मुख्यमन्त्री योगी आदित्यनाथं थीथी थासय् मास्क अनिवार्य यायेगु लिसें खोप मकाःपिं मनूत म्हसीकाः खोप कायेकेगु ज्या न्ह्याकेत नं निर्देशन बिउगु दु ।