मुआब्जा विवादं मण्डला अलपत्र

येँ – थनया तीनकुनेय् दयेकेत्यंगु ‘शान्ति मण्डला’य् स्थानीय वासिन्दायात बीमाःगु मुआब्जा विवाद केन्द्रीय सरकारपाखें ज्यंकेमाःगु खँ येँ महानगरपालिकां धाःगु दु । शान्ति मण्डलाय् स्थानीय वासिन्दायात बीमाःगु मुआब्जा विवादया कारणं अन मण्डला दयेकेगु ज्या न्ह्याये फयाच्वंगु मदु ।

मुआब्जा विवाद स्थानीय निकायपाखें मखुसें केन्द्र सरकारपाखें ज्यंकेमाःगु खँ येँ मनपाया प्रमुख विद्यासुन्दर शाक्यं धयादीगु दु ।
वय्कःया कथं स्वदँ न्ह्यः हे नमूना तयार यानाः ज्या न्ह्याकेगु तयारी मनपां याःगु खःसां नं मुआब्जा विवादं यानाः ज्या न्ह्याके फयाच्वंगु मदु । वय्कःया कथं स्वदँ न्ह्यः हे मनपां नक्सांकन यायेगु ज्या क्वचायेके धुंकूगु दु ।

५० रोपनी क्षेत्रफलय् दयेकेत्यंगु मण्डलाया ज्या गबलय् न्ह्याइ धइगु खँ आः तकं धाये मफुगु खँ नं मनपां धाःगु दु । स्थानीय वासिन्दां थःपिंत बिउगु मुआब्जा चित्त बुझे मजू धकाः मुआब्जा मकासे च्वनाच्वंगु खः । उमिसं मुआब्जाया पुनर्मूल्यांकन जुइमाःगु माग याना वयाच्वंगु दु । अनया नीन्याखा छेँया स्थानीय वासिन्दां मुआब्जा काःगु मदुनि ।

येँ मनपां आन्तरिक व बाह्य पर्यटकयात आकर्षित यायेगु आज्जु कथ गौतम बुद्धया विशाल मूर्ति सहित अन मण्डला दयेकेगु तयारी यानाच्वंगु दु । मनपाया योजना कथं वइगु २०७६ साल दुने उगु मण्डला दयेकेगु ज्या क्वचायेकेगु कथं आज्जु तयातःगु खःसा आः तकं ज्या शुरु हे याये फयाच्वंगु मदु । उगु मण्डलाय् बुद्धया विशाल मूर्तिया लिसें हिन्दु धर्मया मूर्ति नं दइगु खँ धाःगु दु ।

विशाल बुद्ध मूर्ति दुने निगू तल्लाया पार्किङ व पिने स्वंगुलिं कुनं नीप्यघौ लःया फोहरा दइगु खँ धाःगु दु । मनपां मण्डला दयेकेगु निंतिं १ करोड बजेट छुटे यायेधुंकूगु दु । न्हापा केशव स्थापित मनपाया प्रमुख जूगु इलय् अन मञ्जुश्रीया मूर्ति तयेगु धकाः निर्णय जूगु खः ।