नेपालभाषाया न्हूगु म्येँचाः न्हापांगु पलाः पिदन

येँ – वंगु निगू दशक न्ह्यवंनिसें सांगीतिक ख्यलय् न्ह्यचिला च्वनादीम्ह राजु कर्माचार्यया नेपालभाषाया म्येँचाः ‘न्हापांगु पलाः’ पिदंगु दु । वंगु शनिवाः जूगु ज्याझ्वलय् वरिष्ठ म्येँ हालामि प्रेमध्वज प्रधान, वरिष्ठ संगीतकार राजु सिंह, नेपालभाषाया नांजाम्ह म्येँ हालामि जुजुकाजी रंजित, नांजाःम्ह संगीतकार जुगल डंगोल व संगीतकःमि कर्माचार्यया अबु चक्रवीर कर्माचार्यं म्येँचाया पितब्वज्या यानादीगु खः ।

पेशां पाटन अस्पतालया वरिष्ठ ल्याब टेक्निसिनय जुयाच्वनादीम्ह कर्माचार्य थम्हं हे च्वयादीगु म्येँय् वय्कलं हे सः बियादीगु खःसा संगीत नं वय्कलं हे तयादीगु खः । मुक्कं ७ पु म्येँ दुथ्याःगु म्येचालय् रविन दर्शनधारी, रोमन भैल, फिरोज वज्राचार्य, जुगलं डंगोलं संगीत संयोजन यानादीगु खःसा कर्माचार्ययात ज्वःम्येँय् सरस्वति मानन्धरं साथ बियादीगु दु ।

म्येँचाः पितब्वज्या ज्याझ्वलय् कर्माचार्य व मानन्धरं म्येँ न्यंकादीगु खःसा राजन शाहीं निर्देशन व सोहन मानन्धरं छायांकन व सम्पादन यानादीगु ख्वपया म्येँ ‘ध्यपः मैं’या म्युजिक भिडियो नं सार्वजनिक याःगु खः ।

उगु म्युजिक भिडियोय् अर्णेश्वरी शिल्पकार, श्यामसुन्दर शिल्पकार, विश्व भैल, राजु मानन्धर, शर्मिला कर्माचार्य, यूनिक कर्माचार्य, आशाकुमारी कवां, हेलबहादुर मानन्धर, लक्ष्मी लामां अभिनय यानादीगु दु । म्येँचालय् दुथ्याःगु म्येँमध्ये निपू म्येँया म्युजिक भिडियो नं तयार जुइधुंकूगु ज्याझ्वलय् जानकारी बिउगु खः ।

 

सम्बन्धित बुखँ

LEAVE YOUR COMMENTS