नरः जात्राया मूर्ति द्यःछेँय् बिज्याकल

येँ(नेपालभाषा टाइम्स)÷येँ महानगरपालिका वडा नं. ५ नरलय् जुइगु चोक्काथुनारायण (नरः जात्रा)या स्वंगुलिं मूर्ति द्यःछेँय् बिज्याकूगु दु । नर लागाय् जुइगु चोक्काथुनारायणया जात्राया स्वंगुलिं मूर्ति कोटालत्वाःया द्यःछेँय् बिज्याकेवं जात्रा नं क्वचाःगु दु ।

दँय्दसं कतिंपुन्हिकुन्हु जुइगु जात्राया स्वंगुलिं मूर्तियात कौलागा तृतियाया दिनय् द्यःछेँय् बिज्याकूगु खः । द्यःयात द्यःछेँय् बिज्याकेवं थुगुसीया जात्राया सकतां ज्या क्वचाःगु पूर्व वडाअध्यक्ष रमेश डंगोलं कनादिल ।

नरः लागाया हे मौलिक व प्राचीन सांस्कृतिक महत्वं जाःगु संस्कृतिया रुपय् हना वयाच्वंगु नरः जात्राया झ्वलय् सोमवाःकुन्हु नरः (हाडीगाउ, विशालनगर, तिसा पुलेगु पुखू (गहना पोखरी) लगायतया थासय् द्यःखः जात्रा याःगु खः ।

खय् भासं ‘कहीँ नभएको जात्रा हाडीगाउँमा’ धइगु उखान हे दयेकातःगु थनया स्वम्ह नारायण द्यःया जात्रा मेमेथाय् द्यःखः जात्रा याइगु स्वयां फरक खः । मेमेथाय् गुलि नं द्यःखः जात्रा जुइ, व दक्वं थासय गजू च्वय् लाकाः याइसा थनया स्वम्ह नारायण द्यःया जात्रा गजू अःखः यानाः अर्थात गजू क्वय् लाकाः याइगुलिं गनं मदुगु जात्रा धायेगु यानातःगु खः । थ्व जात्रा थुगु लागाया हे प्राचीन जात्रा खः ।

देगःया मूलुखाय् तयातःगु नेपालभाषां च्वयातःगु छगू अभिलेखकथं नरःया थुगु जात्रा जुजु नरेन्द्र मल्लया पालंनिसें शुरु जूगु खः । चोक्टेनारायण नं धाइगु चोक्काथुनारायणया जात्राया निंतिं गुथि व जग्गा तकं तयातःगु दु । गुथि संस्थानया लगतय् चोक्काथुनारायण व स्वम्ह नारायणयानामं गुथि जग्गा तयातःगु दु ।

कतिंपुन्हिनिसें स्वन्हुतक जुइगु जात्राया स्वयेत स्वनिगः व उकिया जःखःया लागां आपालं मनूत वयेगु याइ ।

सम्बन्धित बुखँ

LEAVE YOUR COMMENTS