इन्द्रराज द्यःया द्यःछेँ पुनःनिर्माण क्वचाल

येँ(नेपालभाषा टाइम्स)- येँयाःया इलय् थनया गःकुटि न्ह्यःने ब्वइम्ह इन्द्रराज द्यःया द्यःछेँ पुनःनिर्माण क्वचाःगु दु । येँ महानगरपालिकाया उपप्रमुख सुनिता डंगोलं पुनःनिर्माण क्वचाःगु उगु द्यःछेँया उलेज्या यानादीगु खः ।

छगू करोड स्वयां अप्वः लागतय् येँ महानगरपालिकाया हनुमानध्वाखा दरवार क्षेत्र संरक्षण कार्यक्रमपाखें उगु द्यःछेँ पुनःनिर्माण याःगु खः । द्यःछेँ पुनःनिर्माणया निंतिं थीथी संघसंस्था व व्यक्तिगत रुपं नं ग्वाहालि याःगु इन्द्रराज द्यःछेँ पुनःनिर्माण समितिया नायः तीर्थमान डंगोलं जानकारी बियादीगु दु ।

समितिया नायः डंगोलाय सभापतित्वय् जूगु द्यःछेँ उलेज्या झ्वलय् बागमति प्रदेशसभा सदस्य शैलेन्द्रमान वज्राचार्य, येँ महानगरपालिकाया पुलांम्ह प्रमुख विद्यासुन्दर शाक्य, संस्कृतिविद् डा. चुन्दा वज्राचार्य, भूमि आयोग येँ जिल्लाया अध्यक्ष श्यामकृष्ण प्रजापतिलिसें थीथी व्यक्तिपिं पाहांकथं झायादीगु खः ।