ने. सं. ११४४ कौलाथ्व दुतिया -

स्वय्नगु संकिपाया विशेष प्रदर्शन

यल – ऐतिहासिक लकस कःघाःगु नेपालभाषा संकिपा ‘स्वय्नगु’या विशेष प्रदर्शन जुल । थ्व हे वंगु शनिवाः यलया भोलध्वाखाय् च्वंगु ज्यापु समाजया हलय् हाउसफुल जुइक संकिपा क्यनेज्या जूगु खः । हलिं नेवाः गुथि किपुल्चा कचाया निंतिं सिने ग्राफिक्स बलम्बुया न्ह्यब्वया उगु संकिपा छगू वियोगान्त मतिनाया बाखंया लिधंसाय् निर्माण यानातःगु खः ।

नेवाः संकिपाया प्रचारप्रसार व प्रवद्र्धन यायेगु मुख्य उद्देश्यं उगु संकिपाया विशेष प्रदर्शन यानागु संकिपाया कलाकार सुरज व्यञ्जनकारं जानकारी बियादिल । यलया स्वकुमिपिनिगु विशेष इनापकथं सकिपाया निगू विशेष शो क्यनेज्या जूगु व निगुलिं शो हाउसफुल जूगु विशेष शो क्यनेज्याया कजि तकं जुयादीम्ह कलाकार व्यञ्जनकारं जानकारी बियादीगु दु ।

नोवाः प्याखं स्वयेत मनूतय्गु उपस्थितिं उत्साहित जुयादीम्ह वय्कलं स्वकुमिपिं सकलप्रति आभार प्वंकादिल । लिसें थुकथं नेपालभाषा संकिपाप्रति स्वकुमिपिनगु उत्साह, हःपाः, मतिना दयाच्वन धाःसा नेवाः संकिपाया विकास जुइगु विश्वास प्वंकादिसें वइगु दिनय् अझ थुकथंया प्रदर्शनया निंतिं न्ह्याः वनेत हःपाः जूगु वय्कलं धयादिल ।

संकिपाया निर्देशक अमृतमान महर्जनया कथं स्वनिगलं पिने झापाय् नं छगू शो क्यनेज्या जुइ धुंकूगु दु । भिन्तुना जोशी, सुरज ब्यञ्जनकार, रनेन्द्र महर्जन, शुशिला तन्डुकार, अमृतमान महर्जन, सानु ताम्रकार, नारायणदेवी महर्जन, नगिना जोशी लगायतया कलाकारपिनिगु मू भूमिका दुगु संकिपाया निर्माता गोपाल नकःमि व अजः महर्जन खः ।