महाकवि सिद्धिदासयात लुमंका छझाः गजल

नेपाल संवत् १०४० या जःखः ‘राग गजल कौवाली’ या नामं छगू पर्चा पिहां वःगु खः । व नं मुक्कं छगू पानाया । तर थ्व हे छगू पर्चानिसें न्ह्याइ झीगु नेपालभाषाया गजल परम्परा । च्वमि मेपिं सुं मखु, झी थः हे महाकवि सिद्धिदास महाजु खः । अथेला नेपालभाषाया काव्य ख्यःयात चिनाख“या धात्थेंया रूप दकलय् न्हापां बिउम्ह नं वय्कः हे खः । थ्वयां न्ह्यः तक छुं भचा भजन, छुं भचा तुतः, अले बाखंम्ये, प्याखंम्ये हे जक दयाच्वंगु खः ।

सिद्धिदास हे अज्याःम्ह न्हापांम्ह जुल, गुम्हेसिनं नेपालभाषाय् गलज परम्परा नं न्ह्याकल– व हे ‘राग गजल कौवाली’ पाखें । थःगु मांभाय्या सेवाय् पूवंक थःगु जीवन पानावंम्ह झी महाकविया १५५ क्वःगु बुन्हि न्यायेकेगु झ्वलय् थीथी ज्याझ्वः जुयावयाच्वंगु दु । वय्कः बूगु लाः, नेपाल संवत् ९८७ यंलागा द्वितिया कुन्हु खः । वय्कःया बुन्हि हनेगु झ्वलय् नेपाल प्रज्ञा प्रतिष्ठानया मातृभाषा साहित्य विभागं छगू ज्याझ्वः यात, ‘सिद्धिदास महाजुया व्यक्तित्व व कृतित्व’ विषयय् ।

अथेला सिद्धिदासया साहित्यिक व्यक्तित्वया अनेक रूप दु, उकिमध्ये छता न्ह्यथनेबहगु ला, गलज हे जुल । उकिं उगु ज्याझ्वःया मू आकर्षण जुयाबिल, गजल वाचन । थ्व ज्याझ्वलय् मुक्कं च्याम्ह गजलकारं ब्वति काःगु खः, गुपिं छसिकथं जुल– अगिव वनेपाली, बद्री वेदना, अमृतमान शाक्य, भूषणप्रसाद श्रेष्ठ, सञ्जय शर्मा, रासा, सुशील राजोपाध्याय व तुयु पुं । वय्कःपिं सकसिन छपुंसिबें अप्वः थःथःगु गजल न्ह्यइपुक न्ह्यब्वयादिल ।

ज्याझ्वःया दथुइ छगू गोष्ठी पौ न्ह्यब्वयेगु ज्या नं जुल, राजेन्द्र कुमार पुतापाखें । वय्कःया गोष्ठी पौया छ्यं खः, ‘महाकवि सिद्धिदास व नेपालभाषाय् गजल’ । गाक्कं महŒवपूर्ण जानकारी दुथ्यानाच्वंगु थ्व गोष्ठी पतिइ वय्कलं थ्यंमथ्यं नेपालभाषाय् गजल च्वयेगु इतिहास चिहाकयेक न्ह्यब्वयादीगु दु । सिद्धिदास नेपालभाषाया प्यंगः थांमध्ये छगः थां ला जुल हे, वय्कःयात नेपालभाषाया पद्य गुरु नं धायेगु याः । थुपिं सकतां दथुइ वय्कःया छताः योगदान ला गजल परम्परा न्ह्याकेगु हे जुल ।

राजेन्द्र कुमार पुतां गोष्ठी पतिइ नेपालभाषाय् आः तक गुलि नं गजलयात कयाः सपूm पिदन, गुलि नं गजल च्वयेगु पहःयात कयाः च्वसु पिदनं, उकिया चर्चा यानादीगु दु । वय्कःया निचोड खः– नेपाल भाषाय् गजल साहित्यया पुस्तान्तरण ला जुल, तर पुलांपिनिगु निरन्तरता धाःसा म्हो हे जक खनेदु । अले थुकिया विकास, विस्तार व स्तरीयताय् भचा अभाव खनेदु । उलि जक मखु, राजेन्द्र कुमार पुतायात विश्वास नं दु, नेपालभाषाय् गजल विधा स्यलाक्क न्ह्याइ नं तिनि ।

वय्कलं न्ह्यब्वयादीगु गोष्ठी पतिइ खनेदुगु मगाःमचाःयात कयाः भुषणप्रसाद श्रेष्ठ, अगिव वनेपाली, नरेशवीर शाक्य, प्रेमहिरा तुलाधर व तुयु पुं नं थःथःगु बिचाः नं न्ह्यब्वयादीगु खः । उकिया लिसलय् राजेन्द्र कुमार पुतां थ्व गोष्ठि पौयात अभंm हाकनं क्वातुक च्वयेगु बचं नं बियादीगु खः । ज्याभ्mवः मातृभाषा साहित्य विभागया प्रमुख लक्ष्मी मालीया सभापतित्वय् जूगु खः । वय्कलं ज्याझ्वःया अन्त्यय् नेपालभाषाय् सिद्धिदासया योगदानयात कयाः चर्चा यानादिल ।

अथे हे ज्याझ्वलय् नेपाल प्रज्ञा प्रतिष्ठानमा कुलपति गंगाप्रसाद उप्रेती, उपकुलपति जगमान गुरुङ व सदस्य सचिव जगत्प्रसाद उपाध्यायं नं नेपाल भाषा, थुकिया साहित्य व सिद्धिदासया योगदानयात कयाः ख“ न्ह्यथनादीगु खः । वय्कःपिं सकसियां बिचाः खः– नेपालभाषा व थुकिया साहित्य धयागु मुक्कं नेपाः देय्या अमूल्य सम्पति खः, थुकी गर्व यायेमाः । ज्याझ्वः न्ह्याकादीगु खः– शशीकला मानन्धरं । वय्कः प्रष्तिठानं पिहां वयाच्वंगु थाय्भु पत्रिकाया सम्पादकपिं मध्ये छम्ह खः ।

सम्बन्धित बुखँ

LEAVE YOUR COMMENTS