संस्कृतिविद् गणेशराम लाछिया ७५ क्वःगु बुन्हि हन

थिमि (नेपालभाषा टाइम्स)- संस्कृतिविद् गणेशराम लाछिया ७५ क्वःगु बुन्हि निगू सफू विमोचन यासें तःजिक हंगु दु । मध्यपुर कला परिषद् व ख्यालिगुलि गुथिया मंकाः ग्वसालय् जूगु ज्याझ्वलय् भाजु लाछिया जीवनी सफू ‘कर्मयोगी गणेशराम लाछि’ व वय्कलं च्वयादीगु ‘नेपाल मण्डल बागमति प्रदेशया संगीत परम्परा’ विमोचन जूगु खः । अक्षयमार्ग प्रकाशनपाखें पिथँगु भाजु लाछिया जीवनी सफू सूर्यप्रसाद लाकोजुं सम्पादन यानादीगु खः ।

ज्याझ्वःया मू पाहाँ बागमति प्रदेशया कृषि तथा पशुपंक्षी विकास मन्त्री डा. राजेन्द्रमान श्रेष्ठं सफू विमोचन यानादिसें संस्कृतिविद् लाछिं भाषा, कला, संस्कृति संरक्षणया निंतिं यानादीगु योगदानयात कयाः न्ववानादिल ।

अथेहे विशेष पाहाँ मध्यपुर थिमि नगरपालिकाया मेयर सुरेन्द्र श्रेष्ठं भाजु लाछियात बुन्हिया भिंतुना देछासें नगरपालिकां सम्पदा, कला, संस्कृतिया संरक्षण यानाच्वंगु ज्याया बारे कनादीगु दु । अथेहे उपमेयर विजयकृष्ण श्रेष्ठं थिमिया कला संसकृति संरक्षण यायेत व थनया सम्पदाया बारे लिपांगु पुस्तायात जानकारी बीत थज्याःगु सफू तसकं आवश्यक जूगु खँ धयादिल ।

परिषद्या अध्यक्ष सन्तकुमार प्रजापतिया सभापतित्वय् जूगु ज्याझ्वलय् भाजु लाछिया तःधिकःम्ह काय सन्तोषराम लाछिं साहित्य क्षेत्रय् कृयाशीलपिंत दँय्दसं सिरपाः बीगु निंतिं भाजु गणेशराम लाछिया नामय् झिगू लाखया अक्षय कोष स्थापना यायेगु खँ घोषणा यानादीगु खः । ज्याझ्वलय् थीथी संघसंस्थापाखें भाजु लाछियात हनापौ देछासें सगं बियाः हनेज्या याःगु खः ।