बाघभैरव दाफा म्येँया म्युजिक भिडियो पिदन

किपू(नेपालभाषा टाइम्स)- किपूतय्सं आराध्य द्यःकथं माने याना वयाच्वंम्ह बाघभैरव द्यःया महिमायात कयाः चिनातःगु दाफा म्येँ ‘जय जय बाघभैरव’या म्युजिक भिडियो पिहां वःगु दु । वंगु सोमवाः थनया कीर्तिपुर सिनेप्लेक्सय् छगू ज्याझ्वः यासें बाघभैरवया दाफा म्येँया म्युजिक भिडियो पितब्वज्या याःगु खः ।

मूपाहां जनकवि दुर्गालाल श्रेष्ठं म्युजिक भिडियो पितब्वज्या यानादिसें देशय् राज्यं न्ह्याथेंज्याःगु दमन याना वयाच्वंसां नेपाःयात धाथेंया नेपाः दयेकेगु ज्या किपूमितय्सं याना वयाच्वंगु दु धयादिल ।

विशेष पाहां किपू नगरपालिकाया कार्यवाहक प्रमुख शुभलक्ष्मी शाक्य (सुनितां) म्युजिक भिडियोया निर्माणं बाघभैरवया दाफा म्येँयात जीवन्तता बिउगु दु धासें किपूया संस्कृति, सम्पदा सम्बन्धी मेमेगु म्येँया म्युजिक भिडियो दयेकाः जीवन्तता बीमाःगु खँय् बः बियादिल ।

सभापतिया थासं ज्याझ्वःया संयोजक लिसें दाफा म्येँया संगीत संयोजन यानादीम्ह हरिशरण साय्मिं युट्युब व थीथी माध्यमं वइगु दक्वं ध्यबा बाघभैरव भजन मण्डलयात बीगु घोषणा यानादिल ।

भजन मण्डल पुचलं हे सः बियातःगु म्युजिक भिडियोय् प्रसिद्धि महर्जन, इनाप महर्जन, विजन मानन्धर, मनिन्द्र महर्जनं अभिनय यानादीगु दु । ललेन्द्र शाक्यं निर्देशन यानादीगु म्युजिक भिडियोया छाँयाकन व सम्पादन राजेश शाक्यं यानादीगु खः । म्युजिक भिडियोया निर्माण हरिशरण साय्मि, ज्ञानकुमार महर्जन, प्रताप महर्जन, ललेन्द्र शाक्य, राजेश शाक्यया पुचलं याःगु खः ।