पत्रकार दबू येँ जिल्लाया न्हूधाः
येँ (नेपालभाषा टाइम्स) – नेवाः पत्रकार राष्ट्रिय दबू, येँ जिल्लाया झिंस्वक्वःगु दँमुँज्या व न्याक्वःगु तःमुँज्या वंगु शनिवाः ल्हुतिस्थित बालाजु औद्योगिक क्षेत्रय् च्वंगु आन्तरिक राजस्व ज्याकूया सभाकक्षय् जुल । दबूया येँ जिल्ला समन्वय समितिया ग्वसालय् जूगु तःमुँज्यां न्हूगु ज्यासना पुचःया नं ल्यज्या याःगु खः ।
तःमुँज्यां रत्नकाजी महर्जन ‘मन’या अध्यक्षताय् ल्यःगु न्हूगु ज्यासना पुचलय् वीरेन्द्र विनु शाक्य न्वकु, विमला मानन्धर मिसा न्वकु, राजेन्द्र मानन्धर ‘नीलः’ छ्याञ्जे, सुविन्द्र श्रेष्ठ लिउछ्याञ्जे, तुलसी केशरी प्रजापति मिसा लिउछ्याञ्जे व प्रशान्त डंगोलयात दांभरिं ल्यःगु दु ।
अथे हे येँ जिल्लाया ज्यासना पुचःया दुजलय् कृष्णमान श्रेष्ठ, रश्मी नापित, सलिना शाक्य, रविन्द्र वज्राचार्य, नहकुल महर्जन, अस्मिता श्रेष्ठ, सागर राजलवत व किचः सिंहयात सर्वसम्मतं ल्यःगु दु ।
उगु तःमुँज्यां केन्द्रीय पार्षदय् गंगादेवी महर्जन, प्रेमकुमार श्रेष्ठ, सुगतरत्न सिन्दुराकार, प्रवीणकुमार महर्जन, मनोज श्रेष्ठ‘सार्थक’, जुजुमान महर्जन, दिलिप शाही, सुगम ताम्राकार व राजेन्द्रकुमार महर्जन ‘पुता’यात ल्यःगु दुसा प्रदेश पार्षदय् विराजकाजी राजोपाध्याय, रविन महर्जन, सुरज मानन्धर, उमेश मानन्धर, मदनराम कर्माचार्य व कुसुम वज्राचार्ययात ल्यःगु दु ।
दबूया विधानकथं येँ जिल्लाया निगू नगर उपशाखाया नं ल्यज्या याःगु खः । किपू नगर कमिटीइ प्रताप महर्जन संयोजक व तोखा नगर कमिटीइ सानुराज डंगोल च्वनादीगु दु ।
दबूया केन्द्रीय नायः नृपेन्द्रलाल श्रेष्ठं उलेज्या यानादीगु ज्याझ्वलय् वरिष्ठ न्वकु सुनिल महर्जन, न्वकु सुरेन्द्रभक्त श्रेष्ठ, मूछ्याञ्जे कृष्णकाजी मानन्धरं नं नुगःखँ तयादीगु खः ।
बन्दसत्रय् केन्द्रीय समितिं येँ जिल्लाया पुलांगु ज्यासना पुचःयात ‘असक्षम’ घोषणा यानाः भंग याःगु विषयय् नीलः साय्मि, उदेन न्हूसाय्मि, रश्मि नापित, मनोजरत्न शाही, प्रविण महर्जन लगायतं विधान सम्मत खः वा मखु धइगु बारे सभायात स्पष्ट यायेमाःगु धासें थःथःगु नुगःखँ तयादीगु खः ।
दँमुँज्या समन्वय समितिया कजि राजु नापितया सभापतित्वय् जूगु खः ।
LEAVE YOUR COMMENTS