कलाकार आशाकाजी थकूयात हन

ख्वप (नेपालभाषा टाइम्स)- ख्वप मिडिया सर्कलं बिस्काः जात्राया झ्वलय् छगू विशेष ज्याझ्वः यासें वरिष्ठ कलाकार आशाकाजी थकूयात हनेज्या याःगु दु । सर्कलया नायःलिसें कलाकार राजु मानन्धरया सभापतित्वय् जूगु ज्याझ्वलय् मूपाहांकथं झायादीम्ह वरिष्ठ कलाकार थकूयात हनेज्या याःगु खः ।

सर्कलया नायः मानन्धरं वरिष्ठ कलाकार थकूयात दोसल्ला न्ययेकाः हनापौ देछासे हनेज्या याःगु खः । ज्याझ्वलय् सम्मानित व्यक्तित्व वरिष्ठ कलाकार थकूं थःपिंसं न्हापा आपालं दुःख सियाः ख्यालः व नेपालभाषा संकिपा ख्यलय् बियागु योगदान सितिं मवंगु खँ कनादिसें तत्कालीन राजनीतिक अवस्थाय् नं थःपिंसं उगु ईया प्रवृत्तियात ध्याचू नकु नकुं ख्यालः व संकिपा ख्यलय् मदिक्क न्ह्याः वनाच्वनागु खँ कनादिल । लिसें वय्कलं स्वनिगः दुने व स्वनिगलं पिने तकं वनाः ख्यालः क्यं वनागु ईया लुमन्ति नं इनादीगु खः ।

ज्याझ्वलय् दबुलि नेपालया संरक्षकलिसें संस्कृतिकःमि गणेशराम लाछिं थःगु म्हसीका ल्यंका तयेया निंतिं नेवाः पहिचान म्वाकाः झी सकलें छप्पँ जुयाः न्ह्याः वनेमाःगु खँय् बः बियादिल ।

ज्याझ्वलय् नेपालभाषा साहित्य तःमुँज्याया छ्याञ्जे नरेश खत्री, महानगरीय प्रहरी प्रभाग जगातिया प्रहरी निरीक्षक सूर्यबहादुर खत्री, कलाकार श्यामसुन्दर शिल्पकार, नाट्यकर्मि समाज नेपाल अध्यक्ष लक्ष्मीप्रसाद चवाल, ज्याझ्वःया कजि सुरेन्द्र श्रेष्ठं नं नुगःखँ तयादीगु खः ।

ज्याझ्वलय् सरिता प्रजापति, गंगाराम प्रजापति, राजकुमार मानन्धर, विष्णुसुन्दर देशेमरु, रोशन धौभडेल व कल्पना श्रेष्ठं म्ये न्यंकादीगु खःसा शान्ति राजबाहक व आविका मानन्धरं हुलाप्याखं न्ह्यब्वयादीगु खः ।

बिस्काः नखः व २०७९ न्हूदँया लसताय् जूगु ज्याझ्वलय् थीथी कलाकारतय् नं सम्मान याःगु खः ।

सम्बन्धित बुखँ

LEAVE YOUR COMMENTS