ज्यापु समाजपाखें बाजंगुरुपिंत तःजिक सम्मान

यल (नेपालभाषा टाइम्स)- स्वनिगःया संस्कृति संरक्षणया निंतिं निरन्तर रुपं योगदान बिया वयाच्वंपिं बाजं गुरुपिंत सम्मान याःगु दु । ज्यापु समाज यलया ग्वसालय् गुरुपुन्हि कुन्हु जूगु ज्याझ्वलय् यलया परम्परागत पीगू त्वाःया दाफा म्ये गुरु लिसें खिं, धिमे, बाँसुरी, काःबाजं, दहः, कान्तां डबडब, ढोलकया गुरुपिं यानाः २५० म्हेसित हंगु खः ।

यल दरवार ब्यांक्वेटय् जूगु ज्याझ्वलय् मू पाहाँ संस्कृति, पर्यटन तथा नागरिक उड्डयनमन्त्री जीवनराम श्रेष्ठ, समाजया नायः तीर्थलाल महर्जनं सम्मानित जूपिंत दसिपौ लःल्हानादिउगु खः । सम्मानित जूपिंत बेताली चिकाः, तग्वः तपुली पुइकाः ख्येँ सगं बियाः हनेज्या याःगु खः ।

ज्याझ्वलय् नकतिनि जक नियुक्त जूम्ह संस्कृति, पर्यटन तथा नागरिक उड्डयन मन्त्री जीवनराम श्रेष्ठ व नकतिनि प्रहरी नायब महानिरीक्षकय् बढुवा जुयादीम्ह यलया म्ह्याय्मचा किरण वज्राचार्ययात नं सम्मान याःगु खः । वय्कःपिंत नं ख्येँ सगं बियाः समाजया नायः महर्जनं कार्यकाल सुथां लाक्क न्ह्यायेमाः धयागु कामना यासें दसिपौ लःल्हानादीगु खः ।

समाजया वरिष्ठ न्वकु सन्तमान महर्जनं लसकुस यानादीगु ज्याझ्वलय् यल महानगरपालिकाया कार्यवाहक मेयर मञ्जली शाक्य, यल जिल्लाया सिडिओ, समाजया पुलांपिं नायः लिसें पीगुलिं त्वाःया ज्यापु समुदाययापिनि तःधंगु उपस्थिति दुगु खः ।