ज्यापु दिवसय् तामाङतय्सं नं ब्वति काइगु

येँ (नेपालभाषा टाइम्स)- ज्यापु जाति व तामाङ समुदाय दथुइ आः छगू समुदायया ज्याझ्वलय् मेगु समुदायं नं सक्रिय रुपं ब्वति कयाः ज्याझ्वः झःझः धायेकेगु सहमति जूगु दु । थुकिया न्हापांगु ज्याझ्वः कथं थुगुसी जुइगु ज्यापु दिवसया ज्याझ्वलय् नेपाल तामाङ घेदुङ येँ जिल्ला समितिपाखें नं सांस्कृतिक पहिचान सहित ब्वति काइगु जूगु दु ।

थ्वहे वइगु यःमरि पुन्हि कुन्हु येँया त्यघलं न्ह्याइगु ज्यापु दिवसया मू ज्याझ्वलय् तामाङ घेदुङपाखें थःपिनि जातीय पहिचान सहित ब्वति कायेगु सहमति जूगु दु ।

म्हिगः छगू समारोहया दथुइ थुगुसी जुइगु ज्यापु दिवस ग्वसाः खलःया संयोजक धन बहादुर महर्जन तिमिला व नेपाल तामाङ घेदुङ येँ जिल्ला समितिया कावा अध्यक्ष राजु लामा वाइवा तामाङ दथुइ म्हिगः सहमति पतिइ हस्ताक्षर जूगु खः । ज्याझ्वलय् नेवाः व तामाङ समुदायया थीथी न्ह्यलुवापिनि नं उपस्थिति दुगु खः ।

सहमति कथं थ्वहे दँय् जुइगु तामाङ समुदायया सोनाम ल्होछार ज्याझ्वलय् नं ज्यापु दिवसया संयोजक त्वाः पुचःया नेतृत्वय् ज्यापु पहिचान सहित ब्वति काइगु जूगु दु ।