भुइजःसिइ मनपाया डोजरया विरोध
येँ (नेपालभाषा टाइम्स)÷ येँ महानगरपालिकां वडा १० व बुढानिलकण्ठ वडा ७ य् लाःगु साततले धाःगु थासंनिसें फैकाय् खुसि त्वपुया तःगु स्ल्याब तछ्यायेत डोजर ज्वना वनेवं नगर प्रहरी व स्थानीय जनता दथुइ विवाद जूगु दु । बुढानिलकण्ठ क्षेत्रय् येँ मनपां डोजर चले यायेवं विवाद जूगु खः ।
येँ मनपाया प्रहरीं बुढानिल कण्ठया साततलेय् डोजर चले यायेवं विवाद जूगु खः । स्ल्याब चीकः वंगु नगर प्रहरी व स्थानीय दथुइ छझाः ल्वापु नं जूगु खः । वयां लिपा येँ महानगरपालिकाया मेयर बालेन साह व बुढानिलकण्ठ नगरपालिकाया मेयर मिठाराम अधिकारी दथुइ जूगु वार्ता लिपा खुसि जःखः दयेकातःगु भौतिक संरचना चीकेगु वा मचीकेगु धइगु बारे नापजाँच लिपा जक क्वःछीगु सहमति जूगु दु ।
म्हिगः हे उगु क्षेत्रय् मालपोत कार्यालय चाबहीया प्रतिनिधि सहित येँ मनपाया व बुढानिलकण्ठ नपाया अमिनं नापजाँच यायेगु ज्या न्ह्याकूगु दु । येँ मनपां छुं हे सुचं मबिसे खुसि जःखःया संरचनाय् आकाझाकां डोजर चले यायेवं विरोध याःगु खः ।
खुसि मिचे यानाः छेँ दनेगु लिसें त्वःतेमाःगु सेटब्याक मत्वःतुसे संरचना दयेकातःगुलिं येँ मनपाया प्रहरीं अज्याःगु संरचना थुनेत स्वःगु खः । उगु क्षेत्रय् हरेक दँय् वा वइगु इलय् डुबानय् लानाच्वंपिं स्थानीय वासिन्दां धाःसा खुसि मिचे यानाः दयेकातःगु संरचना चीकेमाः धकाः येँ मनपाया ज्यायात समर्थन नं याःगु खः ।
LEAVE YOUR COMMENTS