जाकि व छ्व तकं विदेशं झिके यायेमाःगु अवस्था

येँ- ३५ दँ न्ह्यः तक जाकि निर्यात याना वयाच्वंगु कृषिप्रधान देय् नेपाः थौं वयाः मुलुकया मुख्य खाद्यान्न जुयाच्वंगु जाकि, छ्व, कःनि व दुसि थेंज्याःगु अन्न तकं पिने देशं आयात यायेमाःगु अवस्थाय् थ्यंगु दु । थ्व अन्नया उत्पादन निरन्तर म्हो जुजुं वनाच्वंगु कारणं थौं जनताया न्हिंन्हिं नयेमाःगु खाद्यान्न तकं पिने देशं झिके यायेमाःगु अवस्थाय् थ्यंगु खः ।

थ्व झ्वलय् देशय् दकलय् अप्वः दुसिया उत्पादन म्हो जूगु दु । वंगु ३५ दँया दुने दुसिया उत्पादन ४० प्रतिशत घटे जूगु दु गुकिं यानाः बजारय् दुसिया भाः जाकि स्वयां नं थिके जूवंगु दु ।

वि.सं २०५८ य् जूगु कृषि गणनायात आधार मानेयायेगु खःसा आः जुइत्यंगु २०७८ सालया कृषि गणना तक थ्यनीबलय् देशय् अन्नबालीया उत्पादन ३० प्रतिशतं म्हो जुइगु अनुमान याना हःगु दु । राष्ट्रिय जनगणना २०७८ थ्वहे वइगु जेठ २५ निसें शुरु जुइत्यंगु दु । नेपालय् न्हापांगु कृषि गणना २०१८ निसें व राष्ट्रिय जनगणना १९६८ सालंनिसें शुरु जूगु खः ।

वि.सं. २०३५ साल तक नेपाः जाकि निर्यात याइगु देय् जुयाच्वंगु खः । तात्कालीन सरकारं प्रमुख खाद्यान्न बाली जाकि निर्यात यायेत २०३५ सालय् ‘धान चामल निर्यात कम्पनी’ स्थापना याःगु खः । उगु कम्पनीं बङ्गलादेश, भूटान र भारतय् जाकि निर्यात याइगु खः । तर वि.सं. २०७८ साल तक थ्यंबलय् नेपाः लछिया २ अर्ब तका बराबरया जाकि आयात याइगु देय् जूगु दु ।

भन्सार विभागया कथं थुगु आर्थिक वर्षया न्हापांगु खुलाय् भारतं ३० करोड किलो व अमेरिकां ७ लाख ३३ हजार किलो जाकि नेपाः दुहां वःगु दु । अथेहे कःनिया खँ ल्हायेगु खःसा ३३ करोड किलो कःनि भारतं दुहां वःगु दुसा ब्राजिल व अर्जेन्टिनापाखें २४÷२४ लाख किलो व दक्षिण अफ्रिकां ३ लाख ५० हजार किलो दुहां वःगुद ु ।

कृषि गणना २०६८ कथं नेपाःया प्रमुख खाद्यान्न बाली जुयाच्वंगु जाकि धान ६, कःनि १२, छ्व ६ व दुसि ४० प्रतिशतं उत्पादन म्हो जूगु दु । अथे हे तछ्व ३५ प्रतिशत व तू १३ प्रतिशत म्हो उत्पादन जूगु दु ।

कृषि विज्ञतय् धापू कथं थथे उत्पादन म्हो जूवंगुया मू कारण भूमिया खण्डीकरण, वा पी जिउगु बुँ बाझः त्वःतेमाःगु व बुँइ आश्रित मिसापिं धमाधम शहरय् च्वं वनेगु प्रवृत्ति खः धाःगु दु ।

कृषि गणना २०५८ पाखें कृषिइ आत्मनिर्भर मिसापिनि ल्याः ८ प्रतिशत क्यंगु खः जबकि २०६८ पाखें थ्व ल्याः १९ प्रतिशत थ्यनाच्वंगु खः । तर बुँ ज्या यायेफुपिं ल्याय्म्हत धमाधम विदेश पलायन जुइगु व फुसां मफुसां बुँज्या यानाच्वंपिं मिसापिं नं शहरय् च्वंगु वनेगु क्रम अप्वयेवं बुँज्या याइपिं मदयाः उत्पादन म्हो जूगु खः । बुँज्या यायेत चाहे जूपिनि लागिं नं सिँचाईं मदुगु, साःया अभाव जुइगु, ज्यामि मदइगु कारणं बुँज्या आकर्षण पेशा मजूगु खँ धाःगु दु । (रासस)

सम्बन्धित बुखँ

LEAVE YOUR COMMENTS