ने. सं. ११४४ ञलाथ्व नवमी -

झी निं सुधार जुइ माली ला ?

हानं सूचं वःगु दु । मेलम्चिया लः आः आम जनताय् याकनं वितरणजुइ । आषाढया दुने मेलम्चिया लः सुन्दरीजलय् क्वफाइ । ‘वल वल , मेलम्चिया लः’ थ्व हल्ला थौं म्हिगःया मखु । दशकौं निसें जनतायात ध्वः लायेगु भ्रामक हल्ला याना वयाच्वंगु दु मेलम्चि प्रशासनं । थ्व भ्रामक तथ्य थौं जनमानसय् थुलि गढे जुइ धुंकल कि मेलम्ची वइ, बी धयागु खँय् जनतां आश मयाये धुंकल । आश त्वःते धुंकल । आः हाकनं ‘याकनं मेलम्चिया लः वइ’ धयागु हल्लां बजार क्वाकेत स्वयाच्वंगु दु । तर आम जनताया विश्वास थुलि ख्वाउँइ धुंकल, सरकार, मेलम्चिया छट्टु प्रशासनतसें वयात अःपुक क्वाकेफइगु स्थिति मखयेधुंकल । थौं वइ वइ धकाः आश्वासन बी, हानं छुं ई लिपा छगू न छगू त्वह तयाः खँयात मेगु हे मोड बी । थज्याःगु ध्वं लायेगु ज्या मेलम्चि योजनां सुनियोजित रुपं निर्भिक कथं याना वयाच्वंगु दु । मेलम्चिया सम्बन्धित अधिकारितय् थ्व नियत जनविरोधी खयां नं उमिसं थ्वयात निश्चित कथं कार्यान्वयन यानाच्वंगु दु ।

‘देशया जनता सोझा, न्ह्याथे याःसां जिउ, छुं याइ मखु’ धयागु खँ धुक्क जुयाः जनताया आवश्यक्तता लिसे खेलवाड यायेगु गुगु दुस्साहस मेलम्चिं यानाच्वन व स्वयं जनताप्रति हे तःधंगु धोका खः । चुनौति खः । आः याकनं लः वइन धयागु गुगु हल्ला मेलम्चिं पित हयाच्वन, थ्व गुलि विश्वसनिय थौं देशया सरकारं निगरानी तयेमाः लाकि म्वाः ? हल्ला कथं ज्या मजूसा सरकारं मेलम्चिया हल्लाखोरीतय्त माःगु दण्ड बी माः लाकि म्वाः ? छु आधारय् लः वइत धकाः मेलम्चिं हानं सुचना पिकात, थुकिया विश्वसनीयता प्रति सरकारं इलय् हे चिउताः क्यने माः लाकि म्वाः । सरकारया थ्व खँय् जनता प्रति दायित्व दु लाकि मदु ? मेलम्चिं लः वइत धकाः म्हुतु चायेकूसां जनतां थ्वयात विश्वास यायेफुगु अवस्था मदु । ग्व वइ धाधां हे मेमेगु त्वह तयाः हानं जनतायात अनिश्चितताया अन्धकारय् तयाबी । जनता थौं निराशां पिहां वये फइगु स्थिति मदुनि ।

थौं कम्युनिष्ट सरकार दु । तसकं शक्तिशाली, थौं नेपाःया कम्युनिष्ट सरकार विश्वय् हे नमूना जूगु दु, नेतातसें गर्व याइ । तर नेतातसें स्पष्ट याये माः कम्युनिष्ट सरकारया साधारण जनताप्रतिया जिम्मेदारी छु छु खः ? उमिगु अत्यावश्यकता गुकथं पूर्ति जुइ ?

लः मवःगु विषयय् तप्यंक मेलम्चि परियोजना दोषी खनेदइ । तर अथे जक धाये फइमखु । थौं जनता निरन्तर फयाच्वनेमाःगु दुःख कष्टया मू कारण कमजोर सरकार खः । मेलम्चि योजना गुगुं स्वतन्त्र, सार्वभौम संस्था मखु । सरकार अन्तर्गतया योजना खः । सरकारया नीति, नियम निगरानी हे वं ज्या याइ । उकिं मेलम्चिया जनता लिसेयाखेलवाड व दाियत्वहीन प्रवृत्तिया निंतिं देशया सरकार नं उतिकं जवाफदेही जुइ, जुइमाः । थौं देशय् लोकतन्त्र वल धाइ । समाजवाद थौं देशया संविधानं हे निर्देशित नीति कथं नालातःगु दु । लः थज्याःगु जनताया अत्यावश्यक वस्तुयात पूर्ति यायेगु समाजवादी सरकारया प्राथमिक दायित्व जुइ । लः विलाशी विषय मखु, तर थौं देशय् सर्वसाधारण जनता लः मदयाः वांवां खनाच्वन, समाजवादी सरकारं मेलम्चियात न्ह्यःने तयाः थःगु जिम्मेवारीं पलायन जुइ दइ ला ? अझ थौं कम्युनिष्ट सरकार दु । तसकं शक्तिशाली, थौं नेपाःया कम्युनिष्ट सरकार विश्वय् हे नमूना जूगु दु, नेतातसें गर्व याइ । तर नेतातसें स्पष्ट याये माः कम्युनिष्ट सरकारया साधारण जनताप्रतिया जिम्मेदारी छु छु खः ? उमिगु अत्यावश्यकता गुकथं पूर्ति जुइ ? सामान्य जनता अपहेलित जुयाः वांवां खानाः म्वायेमाःगु बाध्यता कम्युनिष्ट, समाजवादी सरकारयात ल्वः ला ? थौं सरकारं राजनैतिक सिद्धान्तया बखान जक यानां मगाः, जनस्तरय् सिद्धान्तया प्रतिफल नं अनुभुूत याके फयेकेमाः । कुतुं वइन वइन धकाः ध्वंया लिउलिउ जनतायात ब्वाकेगु ज्या सरकारं यायेमजिउ । थ्व जनविरोधी मजाक जक जुइ । लः वइन वइन धकाः मेलम्चिं पितबिउगु सुचंयात स्वयं प्रधानमन्त्रीं थःगु मातहतय् कयाः थ्व खः कि मखु, जनतायात स्पष्ट यायेमाःगु पलाः छीमाः ।

छखेरं धाइ, देश थौं भ्रष्टाचारं ग्रस्त, माफियातय् चौतफि जगजगी । देश थौं अनेक शक्तिकेन्द्रया ल्हातिइ फँसे जुइधुंकूगु दु । मेखेर कथित नेतातय्के ‘जि हे’ धइगु दम्भ, अहंकार । थःत देवत्वकरण यानाः कथित नेतातसें जनताया देशयात थःगु न्ह्यवःसा खंकी । छम्ह नेतां (नां मधाये, नेतातय्त थौंकन्हय् नां काये मत्यम्ह धकाः संवोधन याइगु) धाइ, ‘जितः प्रधानमन्त्री याःसा नेपाःयात झिदँ दुने हे चीन स्वयां नं विकसित यानाः क्यने । भारत स्वयांला निदँ हे गन खः गन प्रगति यानाः क्यने । थ्व वक्तव्य छम्ह सद्दे नेताया खः लाकि वेँया प्रलाप ? अन्योलय्लाइ । लाठ्ठे खँ ल्हानाः नं देशया नेता धकाः गर्व यायेफुगु थौंया ई । ग्रीक दार्शनिक छम्हेस्यां धाइ, ‘देशं नेतात अज्याःपिं लुइकी, गज्इाःपिं जनता जुइ । झीसं थांै नेतातय् ख्वाः स्व्ये त्वःताः झी जनतां झीगु ख्वाः छकःनि स्वयेमाल ला ? झी निं सुधार जुइमाली ।