आः किपू नं प्लाष्टिक मुक्त नगर

येँ – किपू नगरपालिकां किपू क्षेत्रयात प्लाष्टिक मुक्त क्षेत्र घोषणा यानाः म्हिगःनिसें अभियान न्ह्याकूगु दु । थ्व अभियान वइगु असार मसान्त तक न्ह्याइगु खँ किपू नपा २ नम्बर वडाया वडाध्यक्ष रमेशमान डंगोलं नेपालभाषा टाइम्स यात कनादीगु दु । वय्कःया कथं निला तक अभियान न्ह्याकेधुंकाः अनं लिपा किपुली पूवंक हे प्लाष्टिकया झोला आदियात प्रतिबन्ध तयेगु कथं तयारी जुयाच्वंगु दु ।

प्याष्टिकया पलेसा मेगु विकल्प मालेगु ज्या नं जुयाच्वंगु खँ वय्कलं कनादिल । प्लाष्टिकया कारणं नगर फोहोर खनेदुगुलिं अभियान न्ह्याकेत्यनागु जानकारी बिसें न्हापा थज्याःगु अभियान न्ह्यानाच्वंगु खःसां तःभुखाय् लिपा अभियानं दिपाः काःगु खँ वय्कलं कनादिल ।