लुँया भाः थहां वंगु वनं तुं
येँ – बजारय् लुँया भाः न्हियान्हिथं थहां वनाच्वंगु दु । अन्तर्राष्ट्रिय रुपं डलर कमजोर जूगुलिं लुँया भाः थहां वंगु खँ नेपाल सुनचाँदी व्यवसायी महासंघया पुलांम्ह नायः तेजरत्न शाक्यं कनादीगु दु । वय्कःया कथं चीन व अमेरिका दथुइ ब्वलंगु ट्रेड वारया कारणं अन्तर्राष्ट्रिय रुपं डलर कमजोर जुइवं लगानीकर्तात लुँइ लगानी यायेत आकर्षित जूगुलिं लुँया भाः थहां वंगु खः ।
ट्रेड वारया कारणं डलर जक कमजोर जूगु मखुसें अन्तर्राष्ट्रिय बजारय् शेयरया बजाः नं प्रभावित जूगु कारणं निगुलिं क्षेत्रया मनूत थौंकन्हय् लुँया बजारय् आकर्षित जुयाच्वंगु खँं वय्कलं कनादिल । चीन व अमेरिका दथुइ ट्रेड वारयात कयाः सहलह जूसां समस्या समाधान मजूगुलिं लुँया भाः अझ थहां वनेफुगु खँ नं वय्कलं ‘नेपालभाषा टाइम्स’ यात कनादिल ।
नेपाः व भारत दथुइ स्थिर विनिमयया कारणं नं नेपालय् लुँया भाः वंगु वय्कःया विश्लेषण दु । नेपालय् लुँया बजाः छगू कारणं जक प्रभावित जूगु मखुसें तःगू कारणं प्रभावित जूगु खँ भाजु शाक्यं कनादी । सन् २०१९ दुने लुँया अन्तर्राष्ट्रिय भाः प्रतिऔंस १३०० निसें १३५० अमेरिकी डलर थ्यनीगु वय्कःया अनुमान दु ।
वय्कःया कथं विश्वय् थीथी देशय् रोजगारी म्हो जूगुलिं नं उकिया लिच्वः अमेरिकी डलरयात लानाच्वंगु दु । कस्ट अझ प्रडक्ट थिकेगु कारणं यानाः थीथी देय्या कम्पनीं रोजगार कटौती यानाच्वंगुलिं अमेरिकी डलर अझ कमजोर जुइगु व उकिया लिच्वः लुँया भावय् लाः वनी ।
वंगु पुस १ गते प्रति तोला ५९,५०० तूगु लुँ म्हिगः प्रति तोला ६२,६०० तका थ्यंगु दु ।
भाजु शाक्यया कथं थ्व भाः अझ नं थहां वनेफु । डलर व शेयरय् लगानी मजुइवं उकिया लगानी लुँइ जूगुलिं लुँया भाः अझ थहां वनेफुगु विश्लेषण वय्कःया दु ।लुँया भाः थहां वंगुलिं तिसा दयेकीपिं नं म्हो जुयाः लुँवहः व्यव–सायीतय् ज्या धाःसा म्हो जूवंगु दु ।
LEAVE YOUR COMMENTS