युवा बौद्ध समूहया न्हूधाः

येँँ(नेपालभाषा टाइम्स)- युवा बौद्ध समूह, येँया वंगु शनिवाः क्वचाःगु झिंप्यक्वःगु तःमुज्यां मदनबहादुर तुलाधरया अध्यक्षताय् झिंस्वम्हेसिया न्हूगु ज्यासना पुचः ल्यःगु दु ।
न्हूगु ज्यासना पुचलय् निम्ह न्वकु पदय् राजु शाक्य व कमलतारा तुलाधर निर्वाचित जुयादीगु दुसा छ्याञ्जेय् नानीशोभा मानन्धर, दांभरिंलय् कल्पना देवी तुलाधर व लिउ छ्याञ्जेय् रत्ना शाक्य चयन जुयादीगु दु ।

अथे हे दुजलय् युरिकाजी कंसाकार, ठूलोराजा शाक्य, रजनी ताम्राकार, अकिलशोभा ताम्राकार, दिलहेरा ताम्राकार, वसन्त महर्जन व मतिना मानन्धरयात ल्यःगु दु ।
तःमुँज्याय् समूहपाखें दँय्दसं बिया वयाच्वंगु ‘पञ्चवीर सिंह सिरपाः’या दाता साहु पञ्चवीरसिंह तुलाधरं बुद्धधर्मयात जनमानसय् प्रचार यायेगु युवा बौद्ध समूहया अभियानयात च्वछासे नेपालभाषा ब्वलंकेत तिबः जुइमाः धकाः थम्हं सिरपाः लःल्हाना वयाच्वनागु खँ कनादिल ।

समूहया सल्लाहकार डा. त्रिरत्न मानन्धरं समूहं बुद्ध शासन चिरस्थायी यायेया निंतिं पञ्चशील अभियान, जनजातितय् लागि आपालं बौद्ध जागरण शिविर संचालन याना वयाच्वंगु स्मरण यानादिसें बुद्ध शासनयात अझ धिसिलाकेगु ज्याय् समूहयात न्हापा थें ग्वाहालि दयाच्वनीगु विश्वास प्वंकादिल ।

ज्याझ्वलय् निवर्तमान छ्याञ्जे रजनी ताम्राकारं वार्षिक प्रतिवेदन व कोषाध्यक्ष कल्पनादेवी तुलाधरं आर्थिक प्रतिवेदन न्ह्यब्वयादीगु खः ।
वि.सं २०३९ सालय् पलिस्था जूगु थ्व समूहलं बुद्ध धर्म र दर्शनलाई जनस्तरय् थ्यंकेगुनापं धार्मिक स्वतन्त्रता व धर्मनिरपेक्षताया पक्षय पैरवी याना वयाच्वंगु दु ।