येँमनपां नगर अस्पताल दयेकीगु

येँ – येँ महानगर–पालिकां महानगरवासीया सुविधायात ध्यानय् तयाः नगर अस्पताल निर्माण यायेगु योजना न्ह्यःने हःगु दु । येँ मनपां थःगु क्षेत्रया वासिन्दाात स्वास्थ्य सेवा उपलब्ध याकेगु ल्याखं नगर अस्पताल दयेकेगु योजना हःगु खः । महानगरवासी थःपिंसं पूगु करपाखें येँ मनपां थःपिंत स्वास्थ्य सेवा बीमाःगु माग जुया वयाच्वंगु इलय् येँ मनपां उकथंया योजना दयेकूगु खः ।

महानगरपालिकायाकथं न्युनतम शुल्कय् महानगरवासीयात सकतांकथंया स्वास्थ्य सेवा बीगु उद्देश्यं नगर अस्पताल निर्माणया योजना दयेकूगु खः । येँ मनपां नगर अस्पताल दयेकेगु योजना न्ह्यःने हःसां नं अस्पताल गन निर्माण यायेगु धइगु बारे छुं ठोस निर्णय धाःसा याःगु मदुनि । अस्पताल निर्माणया निंतिं गुगु थाय् उपयुक्त जुइ धइगु बारे नं छुं अध्ययन नं याःगु मदुनि ।

येँ मनपाया प्रवक्ता ईश्वरमान डंगोलं अस्पताल गन निर्माण यायेगु व गुलि श्ययाया दयेकेगु धइगु बारे याकनं हे छगू ठोस निर्णय यायेगु जुइ धयादिल । ‘महानगरवासीया हे इनापकथं व थनया आवश्यकतायात लिधंसाय् ये मनपां नगर अस्पतालया योजना दयेकूगु खः’, प्रवक्ता डंगोलं धयादिल, ‘महानगरया दक्वं वडाया वासिन्दातय् निंतिं सहज जुइकथं पायक जूगु थाय् मालेगु ज्या न्ह्यायेधुंकूगु दु ।’

येँ मनपाया नकतिनि क्वचाःगु चालु आर्थिक दँया नीति तथा कार्यक्रमय् नगरस्तरीय अस्पताल निर्माण यायेगु योजनाया बारे न्ह्यथनातःगु दु । थुकथं हे येँ मनपां चालु आर्थिक दँय् जनस्वास्थ्य सेवा ज्याझ्वःया निंतिं १६ गू करोड २० गू लाख स्वयां अप्वः बजेट विनियोजन नं याःगु दु ।

येँ मनपां चालु आर्थिक दँया दुने हे नगर अस्पताल निर्माण शुरु यायेगु योजना दयेकाच्वंगु दुसा महानगरया थीथी वडाय् नगर स्वास्थ्य क्लिनिक संचालन जुयाच्वंगु दु ।