‘एमसीसीं गठबन्धन दथुइ समस्या ब्वलनेफु’

येँ – पुलांम्ह प्रधानमन्त्री लिसे जनता समाजवादी पार्टीया संघीय परिषद्या अध्यक्ष डा. बाबुराम भट्टराईं प्रतिगमनकारी शक्तियात परास्त यायेगु नितिं चुनाव तक गठबन्धन निरन्तर रुपय् न्ह्यायेमाःगु खँ धयादीगु दु । समाजवादी प्रेस संठगनं ग्वसाः ग्वःगु ज्याझ्वलय् न्ववायेगु झ्वलय् वय्कलं उगु खँ धयादीगु खः ।

आःया गठबन्धनयात त्वाःथलेगु कुतः जुयाच्वंगुलिं सचेत जुयाः न्ह्याःवनेमाः धासें डा. भट्टराईं धयादिल, ‘प्रतिगमन पूर्ण रुपं गुबसं परास्त जुइमखु, उकिंया नितिं निरन्तर रुपय् खबरदारी आवश्यक जुइ, प्रतिगमनकारी शक्तिं छ्यनं मचूतले आःया गठबन्धन कायम जुइमाः, थुकियात वइगु चुनाव तक यंकेमाः, थीथी बहानाय् आःया गठबन्धन त्वाःथलेगु कुतः जुयाच्वंगु दु, उखेपाखे सजक जुइमाः, म्होतिं नं एमसीसी थेंज्याःगु विषयसं फुक्कं पार्टीया छगू हे धापू जुइमाः, यदि अथे मजुल धाःसा एमसीसीया बहानाय् गठबन्धन दथुइ समस्या ब्वलनेफु ।’

उकथं हे ज्याझ्वलय् न्ववायेगु झ्वलय् माओवादी केन्द्रया अध्यक्ष पुष्पकमल दाहालं नं आःया गठबन्धन त्वाःथलेत एमालें कांग्रेसयात थीथी प्रस्ताव छ्वःगु खँ धयादीगु दु । वय्कलं एमालें कांग्रेसयात यकःति सरकार चले याये बीगु प्रस्ताव याःगु खँ धयादिल । तर कांग्रेसया सभापति लिसे प्रधानमन्त्री शेरबहादुर देउवां गुगुं नं हालतय् गठबन्धनयात निरन्तर बीगु खँ थःत धायेगु यानाच्वंगु खँ धयादिल ।

सम्बोधनया झ्वलय् अध्यक्ष दाहालं धयादिल, ‘एमालें कांग्रेसयात गठबन्धन त्वाःथल धाःसा यकःति सरकार चले याकेबीगु व एमसीसी पारित यायेत ग्वाहाली यायेगु प्रस्ताव याःगु दु, तर प्रधानमन्त्री देउवां गुगुं नं हालतय् गठबन्धन क्वथलेगु पक्षय् मदु धकाः धयादीगु दु ।’
अथे हे दाहालं आः नं एमालेया अध्यक्ष केपी ओली शर्मा प्रतिगमनया लँपुइ दुगु उगु खँ संसद थनाच्वंगु पंगलं पुष्टि जुइ धयादिल ।

अथे हे नेकपा एकीकृत समाजवादीया अध्यक्ष माधव नेपालं वइगु चुनावय् गुगुं नं दलया बहुमत वइगु सम्भावना मदुगु धासें गठबन्धन राजनीति अझ न्ह्यःने वनिगु खँ धयादीगु दु । वय्कलं राष्ट्रियसभा व उपनिर्वाचनय् गठबन्धनं चुनाव ल्वायेगु सहमति जूगु धासें धयादिल, ‘वइगु चुनावय् सुयागु नं बहुमत वइमखु, अथे जुयाः गठबन्धनया सरकार ताः ई तक न्ह्याइ, थ्व विषयसं नं गठबन्धन दुने सहलह जूगु दु ।’
उकथं हे नेता नेपालं एमसीसी विशुद्ध आर्थिक ग्वाहालि जुइमाःगु खँ धयादीगु दु । वय्कलं एमसीसी बारे सत्ता साझेदार न्यागू दल दथुइ सहलह यानाः मंकाः निष्कर्ष पिकायेगु खँ नं धासें थम्हं एमसीसीया अन्तर्वस्तुया बारे सहलह यानाच्वनागु व त्रुटी कमजोरी दुसां भिंकाः जक न्ह्यःने यंकेगु खँ धयादिल ।