आः सु सु कुनी, सु सु त्वःती ?
येँ (नेपालभाषा टाइम्स)- हाइप्रोफाइल नेता व कर्मचारीत दुथ्याःगु नक्कली भुटानी शरणार्थी प्रकरणया थुनछेक बहस थौं क्वचाइगु जूगु दु । अदालतं थौं अन्तिम वहस लिपा सु सु कुनेगु व सु सु त्वःतेगु धकाः थौं हे फैसला याइगु खँ धाःगु दु ।
प्रतिवादीतलिसे बयान कायेधुंकाः येँ जिल्ला अदालतया न्यायाधीश प्रेमप्रसाद न्यौपानेया इजलासय् न्हापां सरकारी वकिलपाखें बहस जूगु खःसा वयां लिपा प्रतिवादनीपाखें जूगु बहस म्हिगः क्वचाःगु खः ।
थौं जिल्ला सरकारी वकिलया कार्यालय येँया प्रमुख अच्युतमणि न्यौपाने सहित प्यम्हेस्यां जवाफी बहस याइ । प्रतिवादीया वकिलतय्सं न्ह्यथंगु न्ह्यसःयात कयाः सरकारी वकिलं जवाफी बहस याइगु खः । न्यायाधीश न्यौपानें थौं न्हिनय् २ बजे दुने बहस क्वचायेकेत सरकारी वकिलतय्त धायेधुंकूगु दु ।
जवाफी बहस लिपा अभियुक्ततय्त धरौटती कयाः त्वःतेगु खः वा कुनाः हे मुद्दा न्ह्याकेगु खः धइगु आदेश अदालतपाखें जुइ । बहस क्वचायेधुंकाः इलं लात धाःसा थौं बहनी तक थुनछेक आदेश वये फुगु खँ धाःगु दु ।
भुटानी शरणार्थी प्रकरणय् प्रहरीं अध्ययन प्रतिवेदन सहित जिल्ला सरकारी वकिल कार्यालययात फाइल बुझे यायेधुंकाः उकिया हे आधारय् जिल्ला सरकारी वकिलया ज्याकुथिं वंगु जेठ १० गते अभियोग पौ दर्ता याःगु खः । वयां लिपा आरोपीया बयान क्वचायेकाः जेठ २१ गतेनिसें थुनछेक बहस न्ह्याःगु खः ।
नक्कली भुटानी शरणार्थी प्रकरणय् ३० म्हेसित प्रतिवादी दयेकाः मुद्दा दर्ता याःगु खः । उमिगु विरुद्ध कीर्ते, ठगी, संगठित अपराध, एकीकृत कसुर समेत उगु हे कथं सजायया माग दाबी सहित मुद्दा दर्ता याःगु खः ।
उगु प्रकरणय् २८ करोड ८१ लाख दां बिगो नं माग याःगु दु । घटनाय् द्वपं फयाच्वंपिं मध्ये झिंच्याम्हेसित ज्वनेधुंकूगु दुसा अझ नं झिंनिम्ह बिसिउँ वनाच्वंगु दनि ।
थ्व मुद्दाया बहसय् हाइ प्रोफाइल नेतातय् पक्षय् नांजाःपिं व लोकतान्त्रिक आन्दोलनय् सहभागी जुयाच्वंपिं वकिलतय्त समेत बहस याःगु खःसा उकियात कयाः सार्वजनिक रुपं आलोचना जुयाच्वंगु दु ।
कारवाहीया माग यासें प्रदर्शन
नक्कली शरणार्थी प्रकरणय् दुथ्याःपिंत कारबाही यायेमाःगु माग यासें म्हिगः मानव अधिकार तथा शान्ति समाजं संसद भवन न्ह्यःने प्रदर्शन यात । प्रदर्शनया झ्वलय् सार्वभौम संसदं भ्रष्ट नेतातय्त कारबाही यायेमाःगु माग याःगु खः । उकी शान्ति समाजया संस्थापक सभापति कृष्ण पहाडी सहित झिंखुम्हेसित प्रहरीं ज्वंगु
दु । प्रदर्शनया झ्वलय् थीथी नारा च्वयातःगु प्लेकार्ड नं ज्वना वःगु खः ।
LEAVE YOUR COMMENTS