मोहनि लिपा राजधानीया निर्णय

येँ – ३ नम्बर प्रदेशया राजधानीयात कयाः मोहनि लिपा निर्णय जुइगु खँ सीदुगु दु । मोहनि लिपा स्वन्ति न्ह्यः हे प्रदेशया राजधानी गन तयेगु धइगु निर्णय जुइगु खँ सूत्रं धाःगु दु । सूत्रया कथं प्रदेश राजधानीयात कयाः संसदय् औपचारिक रुपं प्रस्ताव पेश जुइधुंकूगु व अन्तिम निर्णय मोहनि लिपा जुइगु सम्भावना दु ।

प्रदेशया राजधानी गन तयेगु धइगु सम्बन्धय् थीथी कथंया खँ वयेगु यानाच्वंगु दु । प्रदेशया मुख्यमन्त्री डोरमणि पौडेलं हेटौडाय् हे स्थायी राजधानी तयेमाः धायेगु यानाच्वंगु दुसा आपालं धइथें जिल्लाया सांसदतय्सं हेटौंडाय् राजधानी तयेगु थःपिनि निंतिं उचित मजू धासें ख्वप वा पन्तिइ राजधानी तयेमाःगु बिचाः तयाच्वंगु दु ।

हेटौंडाय् राजधानी तयेबलय् थःपिं निन्हु तक गाडीइ यात्रा यायेमाःगु व हेटौंडा थःपिनिगु निंतिं पाय्छिगु थाय् मखु धइगु उमिगु तर्क दु । थ्वहे झ्वलय् सम्भावित राजधानी अध्ययन समिति विरुद्ध ध्रुवप्रसाद चौलागाईं तयातःगु रिटयात कयाः थौं सुनुवाई जुइत्यंगु दु । सूत्रया कथं अदालतय् उगु मुद्दा दर्ता यायेगु ज्या हे गलत धासें संविधानया भावना अःखः उगु मुद्दा दर्ता जूगु खँ धाःगु दु ।