राज्यमन्त्री रामवीरयात बधाई ज्याझ्वः

येँ (नेपालभाषा टाइम्स) – ‘येँ महानगरपालिका १८ वडा दुने वसोवास याना वयाच्वंपिं थीथी ख्यःया कलाकारपिनिगु छगू समूह दयेकाः संस्थागत रुप न्ह्याः वनेगु निंतिं जिपिं न्ह्यचिले धुनागु दु ।’

‘येँमपा १८ वडा छगू थज्याःगु सांस्कृतिक वडा खः, गन थीथी ख्यलय् योगदान बिया वयाच्वंपिं विशिष्ट व्यक्तिपिनिगु जन्म जूगु खः ।’

थुगु खँ येँ महानगरपालिका वडा नं. १८ या वडाअध्यक्ष न्हुछेकाजी महर्जनं लगातार प्यघौ व न्यागू मिनेटतक दनाः म्येँ हालाः ‘वर्ल्ड बुक अफ रेकर्ड’ तयादीम्ह सहरी विकास राज्यमन्त्री रामवीर मानन्धरया बधाई नापं भिंतुना देछायेगु ज्याझ्वलय् धयादीगु खः । वडाअध्यक्ष महर्जनया सभापतित्वय् जूगु भिंतुना देछा ज्याझ्वलय् वडा सदस्य हेराशेभा महर्जनं लसकुस यानादीगु खः । वय्कलं स्वरसम्राट नारायणगोपाल गुरुवाचार्य जन्म जूगु थाय् किलागलय् च्वंगु थौंकन्हय् वय्कःया किजापिनि नामय् दुगु छेँ न्यानाः आः अन नारायण गोपाल प्रतिष्ठान चायेकेगु ल्याखं थःपिंसं ज्या न्ह्याका च्वनागु नं जानकारी  बियादिल ।

ज्याझ्वलय् वल्र्ड बुक अफ रेकर्डय् थःगु नां च्वकेत सफल राज्यमन्त्री मानन्धरं सवारी साधन नवीकरण यायेत वनेबलय् फयेमाःगु समस्या बारे अवगत याकादिल । वय्कलं धयादिल, ‘झीथाय् गाडीया बिलबुक नवीकरण याः वन धाःसा गाडीइ टेपरिकर्ड दु कि मदु धकाः न्यनी, दु धाःसा न्यासः तका पुलेमाः धयागु खँ छिकपिंसं सिउला ?’

‘व न्यासः ता दां छिकपिंके गाडीइ म्येँ न्यंगु वापत रोयल्टी कथं काःगु खः, थौं व जम्मा यानातःगु ध्यबा गुलि थ्यन जुइ छिकपिंसं अनुमान यानादी फु ला ?’, वय्कलं धयादिल, ‘सार्वजनिक व निजी सवारी साधनया यानाः उकथं कयातःगु रोयल्टी जक २ गू अर्ब स्वयां अप्वः थ्यने धंकूगु दु । उगु रोयल्टीपाखें संगीतिक ख्यःया छगू विधाय् जक झीसं महत्वपूर्ण भूमिका म्हिते फतधाःसां सांगीतिक ख्यलय् न्ह्याः वनाच्वंपिं सुं नं मेपिनिगु न्ह्यःने ल्हाः फयेमालिगु अवस्था दइमखु ।’

सम्बन्धित बुखँ

LEAVE YOUR COMMENTS