हिमालयन ट्रान्सबोर्डर रेलमार्गया सम्भाव्यता अध्ययन जुइगु

येँ – नेपाल–चीन हिमालयन ट्रान्सबोर्डल रेलमार्गया पूर्व सम्भाव्यता अध्ययन जुइगु जूगु दु । निगू देयुया रेल अधिकारी दथुइ चीनया राजधानी बेइजिङय जूगु वार्ताय् थज्याःगु सहमति जूगु भौतिक पूर्वाधार व यातायात मन्त्रालयं धाःगु दु । थुगु अध्ययन चिनियाँ प्राविधिपिंसं याइगु खँ धाःगु दु । थुकियात माःगु आर्थिक ग्वाहाली नं चीन सरकारं याइगु खँ धाःगु दु ।

चिनियाँ प्राविधिकं अध्ययन यानाः वइगु भदौं १५ गते तक प्रतिवेदन पेश याइगु खँ मन्त्रालयया प्रवक्ता राजेन्द्रराज शर्मा कनादीगु दु । अध्ययन लिसे अवलोकन भ्रमणया निंतिं मन्त्रालयया सचिव मधुसूदन अधिकारीया नेतृत्वय् वैशाख १५ गते न्हय्म्ह दुजः दुगु प्रतिनिधि मण्डल चीन वंगु खः । प्रतिनिधि मण्डलय् प्रवक्ता शर्मा, मन्त्रालय वैदेशिक समन्वय महाशाखा प्रमुख सहसचिव केशवकुमार शर्मा, रेल विभागया महानिर्देशक अनन्त आचार्यपिं दुथ्याःगु खः ।

प्रतिनिधि मण्डलय् चीनय् च्वंगु रेलमार्गया पूर्वाधार बारे छवाः यंकंया अध्ययन क्वचायेधकाः शनिवाः नेपाः लिहां वःगु खः । चीन सरकारया निमन्त्रणाय् उगु पुचः उखेपाखे वंगु खः । ‘भ्रमणया अवसरय् केरुङ–येँ ७५ किमी रेलमार्गया विस्तृत परियोजना प्रस्ताव (डिपिआर) यायेगु व नेपाःया भौगर्भिक अवस्थां नं न्हूगु प्रविधि छयलेमाःगुलिं रेलमार्गया सम्भाव्यताया अनुसन्धान यायेगु सहमति जूगु खः ’, प्रवक्ता शर्मा धयादी ।

चीनं नेपाःया रेल अधिकारीपिंत तालिम बीगु व रेल नेटवर्क विस्तारया निंतिं ग्वाहालि यायेगु प्रतिवद्धता प्वंकूगु दु । निगू देय्या अधिकारी दथुइ वार्ताया झ्वलय् रेल प्रशासनया अधिकारीपिंसं नेपालया रेल मार्गया विकासया निंतिं चिनियाँ राष्ट्रपति सि जिन पिङं उच्च प्राथमिकता बिउगु खँ कंगु खः ।