कर थकायेवं लुँया भावय् न्हूगु रेकर्ड

येँ (नेपालभाषा टाइम्स)÷ नेपालय् लुँया भावं हानं न्हूगु रेकर्ड कायम याःगु दु । तर थुपालय् धाःसा अन्तर्राष्ट्रिय बजाःया कारणं मखुसें नेपाःया सरकारं १० प्रतिशत कयाच्वंगु कर १५ प्रतिशत याःगुलिं थ्व न्हूगु रेकर्ड कायम जुइक भाः थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं कनादीगु दु । नेपालभाषा टाइम्स लिसे खँ ल्हासें वय्कलं न्हूगु रेकर्ड कथं म्हिगः लुँ तोलां १ लाख १२ हजार ५०० कायम जूगु खँ कनादिल ।

अन्तर्राष्ट्रिय बजारय् न्यासः निसें न्हय्सः तका जक भाः थहां वंगु खःसां नेपाः सरकारं कर अप्वयेवं ४४०० तका थहां वंगु खँ नं वय्कलं कनादीगु दु । वंगु जेठ १४ गते
तक लुँ तोलां १,०८,१०० तका थ्यनाच्वंगु खः ।

म्हिगः अन्तर्राष्ट्रिय बजारय् लुँ प्रतिऔंश १९६५ डलर थ्यंगु खः । थ्व स्वयां न्ह्यः १९४० डलरय् कुहां वःगु लुँया भाः हाकनं बुलुहुँ थहां वनाच्वंगु दु । लुँया भाः थहां वनाः प्रतिऔश २१०० डलर तक थ्यने फइगु अनुमान यानातःगु दु । यदि अन्तर्राष्ट्रिय लुँया बजारय् लुँया भाः २१०० डलर थ्यन धाःसा नेपालय् लुँ तोलां १ लाख २० हजार थ्यनीगु खँ नं बजाः विश्लेषक शाक्य कनादिल ।

सम्बन्धित बुखँ

LEAVE YOUR COMMENTS