लुँया भावय् हानं न्हूगु रेकर्ड

येँ (नेपालभाषा टाइम्स)-अन्तर्राष्ट्रिय बजारय् लुँया भाः थहां वनाः नेपालय् न्हूगु रेकर्ड कायम जूगु दु । म्हिगः लुँ तोलां निद्वः तका थहां वनाः न्हूगु रेकर्ड जूगु खः । म्हिगः लुँ तोलां १ लाख २३ हजार तका थ्यंगु खः । थ्व स्वयां न्ह्यः वंगु पुस १२ गते लुँ तोलां १ लाख २२ हजार तका थ्यनाः न्हूगु रेकर्ड तःगु खःसा आः व स्वयां नं थहां वंगु दु ।

लुँया भाः थहां वंगु कारण धाःसा अमेरिकी डलर कमजोर जूगु लिसें अमेरिकाय् अप्वया वनाच्वंगु बेरोजगारी खः धाःगु दु । नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीकथं बेसाः भाः व अप्वया वनाच्वंगु मुद्रास्फीतिया कारणं नं लगानीकर्तात लुँइ आकर्षित जुइवं अन्तर्राष्ट्रिय बजारय् लुँया भाः थहां वंगु खनेदु ।

म्हिगः अन्तर्राष्ट्रिय लुँ वहः बजारय् लुँ प्रतिऔश ३१ डलर थहां वनाः २११४ डलर थ्यंगु खः । थ्व स्वयां न्ह्यः अन्तर्राष्ट्रिय लुँ बजारय् लुँ प्रतिऔंश २१०० डलर तक थ्यनीगु प्रक्षेपण यानातःगु खः ।

अमेरिकी फेडेरल रिजर्भ बैंकं बिया वयाच्वंगु ब्याजदर क्वमकाल धाःसा लुँया भाः अझ नं थहां वनेफइगु अनुमान जुयाच्वंगु खँ नं विश्लेषक शाक्यं कनादीगु दु । वय्कःया कथं छन्हु निन्हुया दुने लुँया भाः थहां वनाः हाकनं न्हूगु रेकर्ड कायम याये फइगु सम्भावना खने दयाच्वंगु दु ।

थौं अमेरिकी फेडरल बैंकया बैठक च्वनेत्यंगु दुसा वइगु शुक्रवाः अमेरिकी लेबोर डिपार्टमेन्टं अमेरिकाया बेरोजगारीया तथ्यांक सार्वजनिक याइगु जूगु दु । तर अमेरिकी फेडरल बैंकं धाःसा तत्काल ब्याजदर क्वकाइगु सम्भावना मदुगु खँ नं विश्लेषक शाक्यं कनादीगु दु ।

सम्बन्धित बुखँ

LEAVE YOUR COMMENTS