लुँया भाः थहां वनाः स्वनिगःया लुँज्यासः प्रभावित
येँ (नेपालभाषा टाइम्स)- अन्तर्राष्ट्रिय लुँ वहः बजारय् भाः थहां वनेवं नेपालय् लुँया व्यवसाय ठप्प जूगु खँ लुँवहः व्यवसायीतय्सं धाःगु दु ।
फागुन महिनाय् इहिपाया लगन क्वचायेधुंकूगु व वैशाखय् नं लिपांगु वालय् जक लगन दुगु कारणं यानाः थौं कन्हय् लुँया बजार ठप्प जुयाच्वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजार विश्लेषक तेजरत्न शाक्यं कनादीगु दु । वय्कःया कथं थौंकन्हय् न्हूसतक लागाय् च्वंगु बजारय् छुं भचा व्यापार दुसां मुक्कं लुँ पसःया व्यापार धाःसा ठप्प जुयाच्वंगु दु ।
अन्तर्राष्ट्रिय बजारय् लुँ प्रति औंश २९१४ डलर तका कायम जुयाः न्हूगु रेकर्ड तःगु खःसा वयां लिपा लुँइ लगानी याःपिंसं हाकनं लुँ मीगु ज्या न्ह्याकेवं अन्तर्राष्ट्रिय बजारय् लुँ प्रतिऔंश १९०६ डलर तक कुहां वःगु खः । वयां लिपा लुँया भाः थहां वनाः म्हिगः लुँ प्रतिऔंश १९९२ डलर कायम जूगु खः । अमेरिका लिसें थीथी देय्या बैंकत ताथ पल्टे जुइवं लगानीकर्तात लुँइ आकर्षित जूगु खः ।
अन्तर्राष्ट्रिय बजारय् लुँया भाः थहां वनेवं म्हिगः नेपालय् नं लुँया भाः थहां वंगु दु । म्हिगः नेपालय् लुँ तोलां १ लाख ९००२ तका कायम जूगु खः । म्हिगः लुँ तोलां द्वःछि तका थहां वंगु खः ।
अन्तर्राष्ट्रिय रुपं वयाच्वंगु आर्थिक मन्दीया कारणं नं लगानीकर्तात थौंकन्हय् लुँइ लगानी यायेत इच्छुक जुयाच्वंगु कारणं लुँया भाः अझ नं थहां वनेफइगु खँ धाःगु दु । अन्तर्राष्ट्रिय लुँया बजारय् लुँ प्रतिऔंश २ हजार डलर तक थ्यनेफइगु अनुमान यानातःगु खःसां वंगु छवाः न्ह्यः २०१४ डलर थ्यनाः न्हापा यानातःगु प्रक्षेपण समेत हाचां गायेधुंकूगु दु । अस्थिर जुयाच्वंगु मुद्रा स्फीति थुकथं हे कायम जुइगु खःसा अझ नं लुँया भाः थहां वनेफइगु खँ धाःगु दु ।
लुँया बजाः मदयाः बैंकतय्सं आयात यानातःगु २ केजी लुँ नं बैंकय् तुं थानाच्वंगु दुसा मेखे न्हापा लुँ न्यानातःपिंसं आः वयाः लुँ मीगु ज्या यानाच्वंगुलिं नं बजारय् लुँ अभाव मजूगु खँ शाक्यं कनादिल ।
LEAVE YOUR COMMENTS