त्रिभुवन विमानस्थल आः न्हि २२ घन्टा चालीगु

येँ – त्रिभुवन अन्तर्राष्ट्रिय विमानस्थल आवलिं न्हि २२ घण्टा चालीगु जूगु दु । शनिवाः निसें विमानस्थलय् सुथय् ५ बजे निसें चालेगु सुरु जूगु खः । सरकारं वंगु जेठ ७ गते अन्तर्राष्ट्रिय विमानस्थल न्हिं २१ घण्टा संचालनय् हःगु खः । आः घौछि थप यानाः न्हि २२ घन्टा चायेकूगु खः ।
विमानस्थलया आन्तरिक टर्मिनल संचालन व्यवस्थापनया निंतिं सुथय् ५ बजे निसें सुरु यानागु खँ विमानस्थलया महाप्रबन्धक राजकुमारी क्षेत्रीं कनादीगु दु ।

न्हापा सुथय् ६ बजे चालाः ७ बजे तकया दुने आन्तरिक उडान सुरु जुइगु खःसा आवंलि सुथ् ६ बजे निसें हे विमान ब्वयेगु सुरु जुइगु खँ धाःगु दु ।याकनं सुरु जुइत्यंगु मोहनि नखः, पर्यटकीय मौसम व विमानस्थलया चापयात ध्यानय् तयाः सुथय् ५ बजे निसें सुवा बीगु सुरु यानागु खँ महाप्रबन्धक क्षेत्रीं कनादीगु दु ।

आः अन्तर्राष्ट्रिय उडान नं याकनं यायेगु निंतिं व्यवस्थापन ज्या जुयाच्वंगु खँ नं वय्कलं कनादीगु दु । वय्कःया कथं सुथय् दकलय् न्हापनं ६ः४५ वइगु टर्किज एयरवेजया विमान आः २० मिनेट न्ह्यव हे अवतरण याइगु जूगु दु । विमानस्थलया टावर नं ५ः४० निसें हे चायेकूगु दु । विमानस्थलय् ई तंगु मध्य बहनी १२ः३० निसें ३ बजे तक नेपाल एयरलाइन्स व हिमालय एयरलाइन्सं उडान याइ ।

मेमेगु अन्तर्राष्ट्रिय एयरलाइन्स लिसे नं सहलह जुयाच्वंगु खा धाःगु दु । थ्वहे दथुइ कतार एयरं शनिवाः निसें हे छगू उडान थप याःगु दु ।
थौंकन्हय् त्रिभुवन विमानस्थलं आन्तरिकपाखे हेलिकप्टर सहित २० गू कम्पनीं व अन्तर्राष्ट्रियपाखे ३० गू कम्पनीं उडान याना वयाच्वंगु दु ।