रोजगार संयोजक ल्यल

प्रधानमन्त्री रोजगार कार्यक्रम

येँ –  प्रधानमन्त्री केपी ओलीं छुं न्हि न्ह्यव घोषणा याःगु ‘प्रधानमन्त्री रोजगार कार्यक्रम’ कार्यान्वयन यायेगु निंतिं रोजगार संयोजक छनोट याःगु दु । श्रम, रोजगार तथा सामाजिक सुरक्षा मन्त्रालयं देय्या ७५३ गू स्थानीय तहया निंतिं संयोजकत ल्यःगु खः । थुपिं संयोजकतय्त थ्व हे फागुन महिना दुने स्थानीय तहय् खटे यायेगु खँ नं मन्त्रालयं धाःगु दु ।

रोजगार संयोजकतय्सं स्थानीय तहय् वनाः बेरोजगारतय् तथ्यांक संकलन यायेगु, रोजगार मालेगु लिसें प्रधानमन्त्रीं घोषणा याःकथं बरोजगार निर्वाह भत्ता वितरणया ज्या याइगु खँ धाःगु दु । मन्त्रालयं रोजगार संयोजकया निंतिं शाखा अधिकृत तहय् ७०५ म्ह व नायब सुब्बा तहय् ४८ म्हेसित ल्यःगु खः ।

आः नियुक्त याःपिं रोजगार संयोजकतय्त दछिया निंतिं करारय् तइगु खँ मन्त्रालयं धाःगु दु ।रोजगार संयोजक ल्ययेगु निंतिं मन्त्रालयया सचिवया संयोजकत्वय् लोकसेवा आयोग व संघीय मामिला तथा सामान्य प्रशासन मन्त्रालयया सहसचिव दुथ्याःगु छगू छनोट कमिटी गठन याःगु खः ।

रोजगार संयोजकतय्सं स्थानीय तहय् वनाः बेरोजगारतय् तथ्यांक संकलन यायेगु, रोजगार मालेगु लिसें बरोजगार निर्वाह भत्ता वितरणया ज्या याइ

सरकारं रोजगार संयोजकया निंतिं प्रदेशस्तरं आवदेन माग याःगु खः । प्रदेशस्तरय् ल्ययगु निंतिं नं न्हय्गुलिं प्रदेशया सामाजिक विकास मन्त्रालयया सचिवया संयोजत्वय् छगू छगू कमिटी नं गठन याःगु खः । मन्त्रालयया कथं झिद्वलं मल्याक जनसंख्या दुगु स्थानीय तहय् शाखा अधिकृत स्तरया संयोजक खटे याइसा झिद्वलं म्हो जक जनसंख्या दुगु स्थानीय तहय् नायब सुब्बा तहया संयोजक खटे याइ ।

स्थानीय तहय् खटे जुयावंपिं थुपिं संयोजकतय्सं चैत महिना निसें हे रोजगार कार्यक्रमया प्रारम्भिक ज्या सुरु याइगु खँ धाःगु दु ।
सरकारं चालु आर्थिक दँ व वइगु आर्थिक दँया दुने म्होतिं नं छगू लाखम्हेसित रोजगारी बीगु योजना दयेकातःगु दु ।

प्रधानमन्त्री केपी ओलीं छुं न्हि न्ह्यव बेरोजगार युवातय्त दछिया म्होतिं नं १०० न्हु रोजगारी बीगु व थ्व रोजगारी मदुपिंत बेरोजगार निर्वाह भत्ता बीगु घोषणा याःगु खः । थ्व घोषणा कथं दछिया सछि न्हु तक रोजगार मदुपिंत सरकारं तोके यानातःगु न्यूनतम पारिश्रमिकया आधारय् ५० न्हु बराबरया पारिश्रमिक बरोजगार निर्वाह भत्ता बी ।

 

 

सम्बन्धित बुखँ

LEAVE YOUR COMMENTS