थुगुसी आःतकया दकलय् अप्वः पर्यटक

येँ – थुगुसी नेपाः दुहां वःपिं पर्यटकतय् ल्याखं पर्यटन व्यवसायीत उत्साहित जूगु दु । थुगुसी नोवेम्भर तक झिंछला दुने १० लाख १९३० म्ह विदेशी पर्यटक नेपाः दुहां वःगु दु । थुलिमछि पर्यटक नेपाः दुहां वःगु न्हापांखुसी खः ।दँय् झिगू लाख पर्यटक दुकायेगु धकाः सरकारं न्हय्दँ न्ह्यव क्वःछिनातःगु लक्ष्य थुगुसी नकतिनि चूलाःगु खः ।

थुकिया पर्यटन क्षेत्रय् तःधंगु उपलब्धि कथं काःगु दु । थुकिं नेपाःया पर्यटन ख्यःयात न्हूगु उत्साह बिउगु खँ धाःगु दु । नेपाल पर्यटन बोर्डया कथं सन् २०१८ या जनवरी निसें नोवेम्भर तक हवाइ मार्ग जुयाः थुलि पर्यटक दुहां वःगु खः । गुगु थगुनेया झिंछलाया अवधी स्वयां १७ प्रतिशतं अप्वःगु खः । सन् २०१७ य् हवाइमार्गपाखें ९ लाख ४० हजार २१८ म्ह जक पर्यटक दुहां वःगु खः ।

थुगुसी जःलाखःला देय् भारतं निगू लाख ६० हजार १२४ म्ह पर्यटक दुहांवःगु दुसा चीनं १ लाख ३४ हजार ३६२ म्ह पर्यटक दुहां वल । भारत व चीन धुंकाः दकलय् अप्वः पर्यटक अमेरिका पाखें वःगु दु । अमेरिकां जक ८२ हजार ५५५ म्ह पर्यटक दुहां वयेधुंकूगु दुसा बेलायतं ५७ हजार व जर्मनीं ३४ हजार पर्यटक दुहां वःगु दु ।