‘कोशी’ इ माओवादी नेतायात नं आक्रमण
येँ (नेपालभाषा टाइम्स)- प्रदेश नं. १ या नां ‘कोशी’ तःगु विरुद्ध आन्दोलन यानाच्वंपिं पहिचान पक्षधरतय्सं उगु प्रदेशय् माओवादी केन्द्रया संसदीय दलया नेता इन्द्रबहादुर आङ्बोयात नं आक्रमण याःगु दु । पहिचान पक्षधरतय्सं म्हिगः आङ्बोया गाडीइ आक्रमण यानाः वय्कःयात सांघातिक हमला याःगु खः ।
आङ्बो पार्टीया जिल्लास्तरीय बैठकय् ब्वति कायेत ताप्लेजुङ जिल्लाया सदरमुकाम फुङ्लिन वनाच्वंगु इलय् लँय् सुलाच्वंपिं पहिचानवादी कार्यकर्तातय्सं अन हे च्वंगु तोक्मेडाँडा धाःगु थासय् च्वनाः आक्रमण याःगु खः । वय्कःयात लिम्बुवान पक्षधर कार्यकर्तातय्सं आक्रमण याःगु खँ धाःगु दु ।
नेता आङ्बोया कार्यकर्तातय्सं धाःसा लिम्बुवान पक्षधर कार्यकर्तातय्सं वय्कःयात स्यायेगु हे ताः तयाः आक्रमण याःगु खः धकाः द्वपं बिउगु दु । लिसें उमिसं लिम्बुवान कार्यकर्तात मोटरसाइकल गयाः वःगु भिडियो नं सार्वजनिक याःगु दु । लिम्बुवान पक्षधर कार्यकर्तातय्सं आङ्बो च्वनावःगु गाडीइ आक्रमण यानाः नाराबाजी समेत याःगु खः ।
प्रदेशया नां कोशी तयेगु लागिं प्रदेशया मुख्यमन्त्री हिक्मत कार्कीं येँय् हे वयाः माओवादीया अध्यक्ष पुष्पकमल दाहालयात इनाप याःगु खःसा दाहालं कार्कीया हे न्ह्यःने आङ्बोयात फोन यानाः कोशी प्रदेशय् समर्थन या धकाः आदेश बियाहःगु खः ।
पहिचान पक्षधर कार्यकर्तातय्सं वंगु आइतवाः तिनि मुख्यमन्त्री कार्कीयात नं आक्रमण यानाः गाडी तोडफोड याःगु खः ।
LEAVE YOUR COMMENTS