ध्यबा पुलेगु ल्यं दनिसां न्हूगु विमान दर्ता यात

येँ – नेपाल नागरिक उड्डयन प्राधिकरण (क्यान) या कार्यकारी निर्देशकं नियम अःखः न्हूगु विमान दर्ता याःगु द्वपं लाःगु दु । नेपाल नागरिक उड्डयन प्राधिकरणयात पुलेमाःगु बक्यौता दयेक दयेकं सम्बन्धित कम्पनीं हःगु न्हूगु जहजा कार्यकारी निर्देशकं दर्ता याःगु द्वपं महारलेखा परीक्षकया ज्याकुथिं बिउगु दु ।

महालेखा परीक्षकया ज्याकुथिया कथं २०७४÷७५ सं दर्ता जूगु न्हूगु जहाज मध्ये न्हय्गू कम्पनी सरकार व प्राधिकरणयात ३ करोड ५० लाख स्वयां अप्वः ध्यबा पुलेमाःगु दु । तर अज्याःगु कम्पनीं हःगु न्हूगु विमान दर्ता याःगु द्वपं कार्यकारी निर्देशक यात बिउगु दु ।
नेपाल नागरिक उड्डयन नियमावली २०५८ या निमय ८ सं अथे बक्यौता दयेक दयेकं न्हूगु विमान दर्ता याये मजिउगु व्यवस्था यानातःसां नं जिम्मेवार पदाधिकारीं नियमया परिपालना मयाःगु धासें उम्ह हे पदाधिकारीयात जिम्मेवार दयेकाः उगु ध्यबा असुल उपर यायेत नं महालेखां निर्देशन बिउगु दु ।

नियमं पदाधिकारी धकाः धायेबलय् विमान दर्ताया जिम्मेवारी महानिर्देशकयात क्वःछिनातःगुलिं महालेखां तत्कालिन महानिर्देशकयात जिम्मेवार दयेकेमाः धकाः धयातःगु दु ।

प्राधिकरणं धाःसा प्रतिवेदनय् न्ह्यथनातःगु आपालं धयाथें कम्पनीया बक्यौता उठे जुइधुंकूगु व उगु ध्यबा मखु धकाः धाःगु दु । ‘एयरलाइन्स कम्पनीतय्सं प्राधिकरणयात करोडौं शुल्क बुझे याइ, बुझे यानाच्वंगु दु । न्हय्गू विमान कम्पनीया ३ करोड ५० लाख बक्यौता धाःगु दु, व तःधंगु ध्यबा मखु, उकिइ नं अप्वस्यां उगु ध्यबा पुले धुंकूगु दु । महालेखां कमेन्ट याइगु स्वाभाविक खइ, तर क्यानया निंतिं थ्व तःधंगु विशष मखु ।’ क्यानया उपनिर्देशक राजन पोखरेलं कनादी । महालेखाया प्रतिवेदनय् सीता, तारा, बुद्ध, डायनेष्टि, यति, श्री व समिटि एयरलाइनसं ध्यबा पुलेगु ल्यं दयेकं न्हूगु विमान हःगु खःसा उगु विमान दर्ता यायेगु ज्या जूगु खः।