स्वनिगःया फोहोर मुनेगु शुरु

येँ – स्वन्हु न्ह्यवंनिसें थानाच्वंगु फोहोर म्हिगःनिसें मुनेगु शुरु जूगु दु । निरन्तर वा वयाः लँ स्यंगुलिं फोहोर वायेत वंगु गाडी लँय् तुं थाःगुलिं यानाः म्हिगःनिसें मुनेगु शुरु जूगु खः ।
येँ महानगरपालिकाया वातावरण विभाग प्रमुख हरिकुमार श्रेष्ठया कथं लँ स्यंगु व सिसडोलय् नं फोहोर तयेगु थाय् मदुगुलिं यानाः फोहोर मुनेगु ज्या दिनाच्वंगु खः । वंगु झिंस्वदँ न्ह्यवंनिसें नुवाकोटया सिसडोलय् फोहोर व्यवस्थापन याना वयाच्वंगु खः । आः अन फोहोर वायेगु थाय्या अभाव जुइधुंकूगुलिं याकनं उकिया विकल्प मालेमाःगु खँ नं प्रमुख श्रेष्ठं धयादीगु दु ।

हरेक दँय् वा वइगु इलय् येँ फोहोर मुनेत समस्या जुयाच्वंगु दु । लँ स्यनाः गाडी हे सिसडोलया ल्यान्डफिल्ड तक वनेगु समस्या जुयाच्वंगु खँ नं प्रमुख श्रेष्ठं धयादीगु दु । वय्कःया कथं स्वनिगःया फोहोर दीर्घकालीन रुपं व्यवस्थापन यायेगु निंतिं बञ्चरेडाँडाय् फोहोर व्यवस्थापन केन्द्र दयेकाच्वंगु दुसां नं क्वःछिनातःगु ई स्वयां अप्वः ई वनेधुंकाः नं दयेकेगु ज्या क्वमचाःगुलिं यानाः फोहोर मुनेत समस्या जुयाच्वंगु खः ।

थौंकन्हय् कोरोना भाइरसं यानाः सरकारं तयातःगु निषेधाज्ञाया कारणं फोहोर उत्पादन म्हो जूगुलिं भचा अःपुगु खँ धयादिसें वय्कलं यदि न्हापा थें तुं होटेल, कलेज, स्कुल चाल धाःसा फोहोर व्यवस्थापन यायेत समस्या जुइफु ।