ने. सं. ११४४ कछलागा द्वादशी -

अझं मदुनि माभासं शिक्षा

आः अनिवार्य मातृभाषा शिक्षाया लागिं मन्त्रीयात ज्ञापन

येँ – सरकारं स्कूल तगिमय् ब्वंकेगु लागिं तयार यानाच्वंगु न्हूगु पाठ्यक्रमय् मांभासं आखः ब्वंकेगु व्यवस्थायात वेवास्ता याःगु खँयात कयाः म्हिगः नेपालभाषा शिक्षा अभियानं शिक्षामन्त्री गिरिराजमणि पोखरेलयात नापलानाः मांभासं ब्वंकेगु व्यवस्था याना बीत माग यात ।

नांजाःम्ह भाषासेवी लिसें शिक्षासेवी लक्ष्मीदास मानन्धरया अध्यक्षताय् नीस्वंगु उगु अभियानया नेतृत्वय् थीथी भाषासेवीपिं वनाः शिक्षामन्त्रीयात ज्ञापनपौ लःल्हाःगु खः । शिक्षा मन्त्रालयं थौंकन्हय् तयार यानाच्वंगु न्हूगु पाठ्यक्रमय् मांभासं आखः ब्वंकेगु छुं हे व्यवस्था मदुगुलिं शिक्षामन्त्रीयात थ्व ज्ञापन बीमाःगु खँ अभियानया दुजः देवदास मानन्धरं ‘नेपालभाषा टाइम्स’ यात कनादिल ।

वय्कलं कनादी कथं न्हूगु पाठ्यक्रमय् स्वंगू ऐच्छिक पुचः दु । नेपालभाषायात वहे ऐच्छिक पुचः दुने दुथ्याकातःगु दु । स्वंगू मध्ये छगू ऐच्छिक पुचलय् हिसाब लगायतया विषय दुने स्थानीय भाषा दुथ्याकातःगु दु, मेगु पुचलय् कम्प्युटर साइन्स लगायतया विषय दुने मांभाय् दुथ्याकातःगु दुसा मेगु ऐच्छिक पुचलय् विज्ञान लगायतया दुने मांभाय् दुथ्याकातःगु दु ।

थुकिया अर्थ मांभाय् काइपिं विद्यार्थीतय्सं गणित, विज्ञान व कम्प्युटर थेंज्याःगु विषयत ब्वने दइ मखु । म्हिगः वंगु प्रतिनिधि मण्डलं नेपालभाषायात थथे विद्यार्थीतय्त मदयेकं मगाःगु विषयलिसे ल्वाकछ्याना मबीत इनाप याःगु खः ।

थुकिया लागिं भाषासेवीतय्सं ताः ई न्ह्यवंनिसें हे माग याना वयाच्वंगु खःसां सरकारं व्यावहारिक समस्या दु धकाः आलताल यानाच्वंगुलिं आः मातृभाषाया अनिवार्य शिक्षा व्यवस्था याना बीमाः धकाः नं पुचलं माग याःगु खः । भाजु मानन्धरं आः नेवाःतय्सं मेगु खँ त्वःताः अनिवार्य मांभासं शिक्षाया लागिं हे आन्दोलन यायेगु बाहेक मेगु विकल्प मदुगु खँ नं कनादीगु दु ।

पुलांम्ह राज्यमन्त्री दिलीप महर्जनं देशय् गणतन्त्र वयेधुंकाः तकं मांभासं ब्वने दइगु अधिकार प्राप्त मजुइगु खःसा थुकिं सकलें आन्दोलनकारीतय्त आक्रोशित याना बीगु बिचाः तयादीगु खः ।