‘बागमति प्रदेश’ विरुद्ध प्रदर्शन

येँ – ३ नम्बर प्रदेशया नां ‘बागमति’ तयेगु धकाः सत्तारुढ दल नेकपाया सचिवालयं याःगु निर्णयया विरोधय् म्हिगः वंघलय् नेवाः समुदायं विरोध प्रदर्शन यात । ‘बागमति प्रदेश’ या विरोधय् जूगु सभाय् नेवाः न्ह्यलुवा डा. महेशमान श्रेष्ठ, राजभाई जकःमि, नेकपा प्रदेश ३ या दुजः उमेश स्थापितपिंसं न्ववानादीगु खः । सभा लिपा वंघलंनिसें छगू जुलुस पिकासें असनय् क्वचायेकूगु खः ।

थ्वहे झ्वलय् म्हिगः सुथय् च्वंगु नेवाःतय्गु थीथी खलः पुचःया मंकाः बैठकं नेकपा सचिवालयं ‘बागमति प्रदेश’ नां तयेगु धकाः याःगु निर्णयया विरोध यासें छगू मंकाः वक्तव्य पित बिउगु दु । वक्तव्यय् नेपाल कम्युनिष्ट पार्टी (नेकपा)या सचिवालयं ३ नम्बर प्रदेशया नां बागमति प्रदेश कायम यायेगु धकाः याःगु निर्णय विरुद्ध नेवाःतसें नेकपाया उगु निर्णय पूर्ण रुपं अधिनायकवादी, असंवैधानिक व अप्रजातान्त्रिक जूगु धासें उकियात तत्काल लित कायेत माग याःगु दु । लिसें थ्व मागयात बेवास्ता यात धाःसा आः वइगु दिनय् ब्वलनीगु असहज परिस्थितिप्रति नं सचेत याःगु दु ।

म्हिगः सुथय् येँया नेपाः ब्यांक्वेटय् नेवाः न्ह्यलुवाः मल्ल के. सुन्दर, डा. महेशमान श्रेष्ठ, दिलीप महर्जन, चन्द्र महर्जनलिसें थीथी नेवाः संघसंस्था व नेवाः आन्दोलनय् आवद्ध ब्यक्तिपिं सहित च्वंगु भेलां उगु विरोध वक्तव्य पिथंगु खः । वक्तव्यय् सत्तारुढ नेपाल कम्युनिष्ट पार्टी (नेकपा)या सचिवालय बैठकं जनताया अपेक्षा अःखः ३ नम्बर प्रदेशया नां बागमति प्रदेश तयेत प्रदेश सरकारया प्रमुखयात निर्देशन बिउगु खँय् नेवाः समुदायया गम्भीर ध्यानाकर्षण जूगु खँ न्ह्यथनातःगु दु ।

‘नेवाः समुदायपाखें ताःई न्ह्यवं–निसें संघीयता दुने नेवाः स्वायत्त राज्यया माग यानाः थीथी चरणया आन्दोलन याना वयाच्वंगु खः । अथेहे, नेवाः व तामाङपिनिगु इतिहास, सभ्यता व बसोबासया लागा कःघाःगु ३ नम्बर प्रदेशया नां नेवाः ताम्सालिङ प्रदेश कथं जुइमाःगु खँ तयाः नेवाः व तामाङपिंसं थीथी चरणया संघर्ष व अभियान न्ह्याका वयाच्वंगु खः । लिसें प्रदेशसभाय् थुगु प्रदेश दुने विकसित ऐतिहासिक सभ्यताया आधारय् नेवाः ताम्सालिङ प्रदेश, नेपाल मण्डल प्रदेश लगायत थीथी नां तयेगु प्रस्ताव दर्ता जुयाच्वंगु खः । तर प्रदेशसभाय् सहलह यायेगु अवसरयात हस्तक्षेप यायेगु कथं पार्टीं बिउगु निर्देशन संघीयताया मान्यता व लोकतान्त्रिक विधि प्रक्रिया अःखः ज्या खः’ वक्तव्यय् धयातःगु दु ।

अथे हे वक्तव्यय् धयातःगु दु, ‘नेपाल कम्युनिष्ट पार्टी (नेकपां) बागमति प्रदेश नां तयेत बिउगु निर्देशन तुरुन्त लित कायेत जोडदार अपील यानाच्वना । अथे मजुल धाःसा वइगु दिनय् ब्वलने फइगु असहज परिस्थितिप्रति सचेत यानाच्वना ।’ ३ नम्बर प्रदेशया नां पहिचान कथं नामांकन जुइमाःगु धासें सार्वजनिक जूगु वक्तव्यय् नेवाः पहिचान व अधिकारया नितिं न्ह्याइगु आन्दोलनय् ऐक्यबद्धता व समर्थन यायेत सकसितं इनाप नंं यानातःगु दु ।

अथेहे भेलाय् नेवाः न्ह्यलुवा मल्ल के. सुन्दरं बागमति प्रदेश नामांकन विरुद्ध आन्दोलन न्ह्याकेगु नितिं तत्काल ३ नम्बर प्रदेशसभाया पहिचान पक्षधर दुजःपिंनाप मुँज्या च्वनेमाःगु, नेकपाया नायः पुष्पकमल दाहाल प्रचण्ड नापलानाः झीगु धारणा स्पष्ट यायेमाःगु, ३ नम्बर प्रदेशया मुख्यमन्त्री व सभामुखपिंत नापलानाः पार्टीं संघीयताया धर्म व मर्म अःखः बिउगु उजंयात कयाः सहलह ब्याकेमाःगु व थ्वहे पुस १९ गते झिक्वःगु नेवाः एकता दिवस बागमति प्रदेश नामांकन यायेत्यंगु विरुद्ध शक्ति प्रदर्शन कथं हनेमाःगु प्रस्ताव तयादीगु खःसा उगु प्रस्तावयात सर्वसम्मतिं पारित याःगु खः ।

थ्वहे झ्वलय् मेखे प्रदेशया नांयात कयाः सत्तारुढ दल नेकपा सचिवालयं याःगु निर्णययात प्रदेश ३ या आपालं सांसदतय्सं नं विरोध याःगु दु । प्रदेश ३ या नेकपा सांसद विशाल खड्कां पार्टीया निर्णय थःपिंत स्वीकार्य मजू धासें उकिया विरोधय् थःपिंसं स्वनिगःया सांसदपिं लिसे सहलह यायेत्यनागु खँ कनादिल । सांसद खड्कां पार्टीया निर्णय थःपिंत स्वीकार्य मजू धासें यदि पार्टीं थुकी ह्विप जारी यात धाःसा उकिया विरोधय् थःपिंसं सदनय् ‘फ्लोर क्रश’ समेत याये मालीगु अवस्था ब्वलनेफु धासें पार्टीं थःगु निर्णय भिंकेमाःगु माग यानादीगु दु ।

नेकपा सचिवालयं याःगु थ्व निर्णययात विपक्षी दल नेपाली कांग्रेसं नं विरोध यासें नामांकरया अधिकार प्रदेश सभायात बीमाःगु माग याःगु दु ।