दक्वं पालिकायात न्यायिक समिति राष्ट्रिय सम्मेलनया ब्वना पौ

येँ(नेपालभाषा टाइम्स)- येँ महानगरपालिकाया ग्वसालय् वइगु चैतया निगूगु वालय् जुइगु ‘न्यायिक समिति राष्ट्रिय सम्मेलन’ ब्वना पौ देय्न्यंकंया पालिकाय् छ्वयेगु ज्या जूगु दु । वइगु चैत १५ व १६ निन्हुयंकं जुइगु सम्मेलनय् ब्वति कायेत इनाप यासें देय्न्यंकंया पालिकायात ब्वना पौ छ्वयेगु ज्या जूगु सम्मेलन आयोजक मूल समारोह समितिं जानकारी बिउगु दु ।

येँ महानगरपालिकाया उपप्रमुखलिसें न्यायिक समितिया संयोजक सुनिता डंगोलया अध्यक्षताय् च्वंगु सम्मेलन आयोजक मूल समारोह समितिया बैठकय् सम्मेलनया तयारीया झ्वलय् आतक जूगु ज्याया बारे नं जानकारी बिउगु खः ।

उपप्रमुख डंगोलं थःपिंसं देय्या दक्वं नगरपालिकाया न्यायिक समितिया संयोजक सम्मेलनय् ब्वति कायेत इनाप यासें ब्वना पौ छ्वयागु व यदि वय्कःपिं उपस्थित जुइ मफइगु अवस्थाय् समितिया दुजःयात जूसां सम्मेलनय् ब्वति कायेकेत इनाप यासे उकथं हे पत्राचार यानागु जानकारी बियादीगु दु ।

प्रमुख प्रशासकीय अधिकृत वसन्त अधिकारीं सम्मेलनं वइगु दिंयात मार्ग निर्देश याये फइगु विश्वास प्वंकादिसे सम्मेलनया तयारी तीव्र रुपं न्ह्याकेत व विभागं नं आवश्यक व्यवस्थापनय् ध्यान बीत इनाप यानादिल ।

समितिया सदस्य सचिवतकं जुयाच्वनादीम्ह कानुन तथा मानवअधिकार विभागया प्रमुख वसन्त आचार्यं सम्मेलनय् ब्वति कायेत इनाप यासें दक्वं पालिकाय् ब्वना पौ छ्वयेगु ज्या जूगु जानकारी बियादीगु खः । वय्कलं दक्वं पालिकायात इमेलपाखें ब्वना छ्वयागु नापं नेपाल नगरपालिका संघ व गाउँपालिका राष्ट्रिय महासंघपाखें नं ब्वना छ्वयागु जानकारी बियादीगु दु ।

अथे हे बैठकं सम्मेलनय् ज्यापौ न्ह्यब्वइम्ह, टिप्पणी याइम्ह व सत्रया अध्यक्षता याइम्हेसिया नां नं अनुमोदन याःगु दुसा सम्मेलन लिपा प्रस्तुति, प्रस्तुतियात कयाः सहलह व विषयगत सहलह लिपा येँ घोषणापत्र नं जारी याइगु जूगु दु ।