उन्मुक्तिया सांसदतय् प्रदर्शन, रेशम चौधरी त्वःतकेत सदनय् नं प्रदर्शनया तयारी

येँ (नेपालभाषा टाइम्स)÷मेमेगु पार्टीया सांसदत भेला, बधाई कालबिल व नेता ल्ययेगु ज्याय् व्यस्त जुयाच्वंगु इलय् नं तराई लागाया उदियमान पार्टी नागरिक उन्मुक्ति पार्टीया सांसदत धाःसा म्हिगः येँया फिब्व ख्यलय् च्वनाः प्रदर्शन यानाच्वन ।

थःगु पार्टीया संरक्षक लिसें थारु अभियन्ता रेशम चौधरीयात त्वःतेमाः धइगु माग यासें म्हिगः उगु पार्टीया फुक्क हे नवनिर्वाचित सांसदत फिब्व ख्यलय् प्रदर्शन याः वःगु खः ।

उकी पार्टीया नायः एवं सांसद रञ्जिता श्रेष्ठ नापं प्रतिनिधिसभाया प्यम्ह व प्रदेश सभाया झिंनिम्ह सांसदतय्सं ब्वति काःगु खः । उकी स्वतन्त्र हैसियतं चुनाव त्याकादीम्ह रेशम चौधरीया अबु नं दुथ्याः ।

प्रदर्शन पूवंक शान्तिपूर्ण जूगुलिं उकी छुं कथंया नारा मथ्वयेकागु खँ नेता श्रेष्ठं कनादिल । थःपिंसं फिब्व ख्यलय् वनाः थथे शान्तिपूर्ण प्रदर्शन यानाच्वनागु झिन्हु दयेधुंकूगु खँ कँसें नेता श्रेष्ठं धयादिल, ‘कन्हय् संसदय् शपथ ग्रहणया कार्यक्रम दु । शपथ ग्रहण लिपा जिमिसं सदनय् नं थ्वहे माग थ्वयेकाः प्रदर्शन यायेगु जुइ ।’

उगु प्रदर्शनय् सांसदतय्सं झुठा मुद्दा तयाः कुनातःपिं राजबन्दीत त्वःति, लाल आयोग सार्वजनिक या, अध्यादेश जारी या धकाः च्वयातःगु प्लेकार्डत ब्वयावःगु खः ।
थौंकन्हय् उन्मुक्ति पार्टी सरकारय् नं वनीगु चर्चा दुसा थः नेता मत्वःतूतले सरकारय् मवनेगु खँ नं अध्यक्ष श्रेष्ठं कनादिल ।

मय्जु श्रेष्ठ वंगु चुनावय् त्याना वःपिं फुक्क हे पार्टीत मध्ये छम्ह हे जक मिसाम्ह अध्यक्ष खः । वय्कः कैलालीं निर्वाचित जुयादीगु खः ।

सम्बन्धित बुखँ

LEAVE YOUR COMMENTS