मदुम्ह वडा अध्यक्ष श्रेष्ठया अन्त्येष्टि

येँ -मदुम्ह येँ मनपा १९ वडाया अध्यक्ष शशिलाल श्रेष्ठया शुक्रवाः पशुपतिइ अन्त्येष्टि जुल । व स्वयां न्ह्यः द्वकाद्वःस्थित १९ वडाया ज्याकुथी वय्कःया शवयात अन्तिम श्रद्धांजलिया लागिं तःगु खः ।
पशुपतिइ जूगु अन्त्येष्टिइ येँ मनपाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ लिसें थीथी वडाया अध्यक्षपिं व येँ मनपाया कर्मचारीपिनि उपस्थिति दुगु खः । लिसें नेपाली कांग्रेसया स्थानीय कार्यकर्तात नं आपालं थ्यंगु खः ।

वडा अध्यक्ष श्रेष्ठ नसा कुहां वनीगु नलीइ क्यान्सर जुयाः म्हिगः सनिलय् नर्भिक अस्पतालय् मदुगु खः । वय्कः ६५ दँ दुम्ह खः ।

शुक्रवाः न्हिनय् १ बजे तक वय्कःया अवस्था बांलानाच्वंगु खःसा २ बजेपाखे भचा मछिंसे च्वनेवं आइसीयुलय् तयाः वासः याकूगु खः । वय्कःयात वासः यानादीम्ह डा. राजेन्द्र बरालं कनादीकथं वासः यानाच्वंगु इलय् हे आकाझाकां वय्कःयाके सुगर अप्वयाः मदुगु खः ।

मदुम्ह भाजु श्रेष्ठ वि.सं. २०४३ सालय् वडा सदस्य कथं निर्वाचित जुयादीगु खःसा वयां लिपा वि.सं. २०४९, २०५४ व २०७३ सालय् वडा अध्यक्ष निर्वाचित जुयादीगु खः ।

वय्कः मदुगु दुःखय् येँ मनपाया मेयर विद्यासुन्दर शाक्यं शोक वक्तव्य पिकयाः दुःख प्वंकादीगु दु । म्हिगः छन्हु येँ मनपाया ज्याकू नं शोक स्वरुप बन्द याःगु खः ।
मदुम्ह श्रेष्ठया जहान लिसें स्वम्ह म्ह्याय् व छम्ह काय दी ।